Eyja & Óli - í Kóngsins Köben -

Danmörk var það heillin

2008-10-12T14:02:00.003Z

Jæja gott fólk

Ætli það sé ekki úr vegi að skrifa nokkur orð hérna á bloggið. Ekki mikið aktivitet og allskostar óvíst að það breytist eitthvað.

Þannig er mál með vexti að við höfum ákveðið að hreiðra um okkur hérna í Danmörkinni í einhver ár í viðbót og höfum við, af því tilefni, bæði fengið vinnu hér í Baunalandi. Ég fór nú ekki langt, flutti mig yfir í Actavis Nordic, en Eyja fékk vinnu í Novo Nordisk. Ég er búinn með eina viku í nýju vinnunni og líkar bara ljómandi vel og verður spennandi að takast á við nýjungar...og náttúrulega dönskuna. Eyja byrjar hins vegar 1. des næstkomandi þegar hún verður búin að skila ritgerð og verja hana. Síðan er að sjálfsögðu stefnt á að halda upp á jólin á Íslandi, allavegana þetta árið.

Annars er stutt í næstu heimsóknir hingað á Dalstrikið. Þriðjudaginn 28. október næstkomandi koma systir mín Sigríður og tilvonandi mágur minn Maggi með lest frá Lübeck og verða hjá okkur í 2 nætur. Ekki leiðinlegt að fá þau í heimsókn, og sérstaklega þar sem ég treysti á að fá smá sýnishorn af hinu víðfræga marsipani Niederegger, sem framleitt er einmitt í Lübeck.

Stuttu eftir að Sigga og Maggi eru farin af landinu mæta Frú Borghildur og Rúnar til okkar og ætla að vera hér í nokkra daga, eða frá byrjun nóvember til ca. 9 eða 10. nóvember (er lélegur á dagsetningunum). Það verður án efa gert eitthvað sniðugt á þeim tíma, allavegana heimsótt H&M og við Rúnsi skellum okkur í fótbolta. S.s. mikið fjör á okkur :)

Ekki hafa fleiri bókað far hingað til okkar, en það er nú fljótlegt að breyta því.

Annars er Eyja bara að hamast í ritgerðinni og ég að hamast í að slappa af svona á sunnudags eftirmiðdegi. Kveðjum við ykkur því að sinni héðan af Dalstrikinu.

Med venlig hilsen,
Óli

Ísland í kvöld!

2008-06-29T12:41:00.003Z

Sæl veriði

Afskaplega lítið verið að blogga þessa dagana, enda nóg annað að gera. Hér kemur smávegis yfirlit yfir það sem hefur verið að gerast hjá mér undanfarna daga. Vil vara einstaklinga sem hafa lítinn sem engan áhuga á golfi eða fótbolta við þessari færslu:

Golfferðin: Var alveg ótrúlega skemmtileg, golfvellirnir magnaðir og aðstaðan eins og best verður á kosið. Við pöntuðum næstum strax fyrir næsta ár, svo ánægðir vorum við með þetta!
Golfið sem slíkt hjá mér gekk upp og niður, 2 fuglar lágu í valnum og 19 pör á 4 hringjum en því miður engin lækkun. Gamli og litli bróðir lækkuðu sig hins vegar báðir og voru því sigurvegarar GÁM&Sons mótsins, þeim til mikillar ánægju.

Knattspyrnan: Stórklúbburinn Ísborg er á hraðri uppleið upp stigatöfluna og erum við nú í öðru sæti eftir fyrri hluta mótsins. Ég meira að segja farinn að taka upp á því í síðustu leikjum að skora mark, sem hefur ekki gerst í háa herrans tíð. Gaman af því.

Og meira golf: Get nú ekki sleppt því að minnast á það að ég tók þátt í 150 manna móti um daginn á Mølleåens Golfklub í Allerød og náði þar öðru sæti, að sjálfsögðu á punktum. Fékk forlátan "bikar" að launum (meira svona sérmerkt glas) og náði ég að lækka forgjöfina niður í 19,8 og markmiðinu fyrir Íslandsförina því náð.

EM: Er nánast ekki búinn að missa af leik á EM í ár, enda heimavinnandi og leikirnir alltaf á kvöldin hér í Danmörkinni. Spáði Króötum og Hollendingum mikilli velgengni sem gekk að sjálfsögðu ekki eftir. Spái hins vegar Spánverjum sigur í kvöld, þó svo að frændur mínir Þjóðverjar eru mótherjar. Stefni á að sjá a.m.k. fyrri hálfleikinn í kvöld á Kastrup.

Annars er maður bara búinn að vera að vinna og leika sér, ásamt dassi af matarboðum og skemmtilegheitum. Eyja er, eins og staðan er núna, stödd í miklu prógrammi í Berlín með fjölskyldunni sinni og verður væntanlega mikil stemmning í kvöld þegar úrslitaleikurinn í EM verður háður.
Ég er hins vegar á leiðinni heim á skerið og tek að sjálfsögðu góða veðrið með mér (ef þess þarf) og mæti ferskur í vinnu í fyrramálið.
Sumarplanið er svo eftirfarandi: Golf, veiði, fótbolti, fjölskyldusamkomur og partý....s.s. nóg um að vera.

Verð með gamla númerið mitt á Íslandi: 898-8614 fyrir áhugasama.

Reikna ekki með að blogga mikið á meðan ég verð á Íslandi...þið sláið bara á þráðinn ef ykkur vantar update :)

kv. ÓliG

Við eigum þetta til...

2008-06-20T20:58:00.003Z

Haldiði ekki að við skötuhjúin séum bara búin að vera myndarleg í dag... Við skelltum á okkur svuntu og hrærðum í einn skammt af "Sex and the city cupcakes". MMmmmmm.... Veeelllýýý næs. Erum að vísu með hálf illt í maganum núna, en það er bara vegna græðgi og ofáts.

Tíminn þýtur líka áfram og á föstudaginn eftir viku er stefnan tekin á Berlín. Það þýðir að nú er að renna upp síðasta helgin sem við Óli erum í sama landi í langan tíma... það eru ca. 2 og 1/2 mán. þangað til það gerist aftur. Ekki spes... En við ætlum að kíkja í bæinn á morgun og svo út að borða. Og svo er planið að heimsækja elefantana í dýragarðinum á sunnudaginn... Þeir fengu nebblega nýtt hús um daginn og við verðum að skoða það áður en Ólafur fer heim í hundaherbergið :o)

Vonandi eru bara allir hressir og kátir þarna hinum megin við hafið...

kv. Eyja

Einskær leti...

2008-06-15T20:18:00.003Z

og jetlag og EM hefur orðið til þess að enn hefur ekkert verið bloggað um ameríkuferðina miklu.
Ferðin var náttúrulega algjör snilld... þeir sem eru spenntir að sjá myndir og ekki hafa enn kíkt á bloggið hennar Fjólu geta séð gott yfirlit hér. Það þarf bara aðeins að skrolla niður hjá henni :o) Við skemmtum okkur konunglega... fórum í nokkrar búðir... sightseeing... roadtrip og bara allan pakkann. Ferðalögin fram og til baka reyndust samt aðeins lengri en ég hafði búist við. Ég var aldrei búin að hafa fyrir því að reikna út hversu langt flugið var í heild... það reyndist um 15 tímar hvora leið... Mikið fjör. Og ég er víst líka doldið krimmaleg á amerískan mælikvarða... það þurfti að hræra í töskunni minni í Atlanta á leiðinni til SF og í SF á leiðinni heim leit ég víst út fyrir að vera með sprengiefni í farangrinum og var stungið inn í einhvern blástursklefa með öllu tilheyrandi. En bara takk enn og einu sinni fyrir fjörið Fjóla... þetta var sknilld!!

Um helgina komu svo Sigga frænka og Pétur í heimsókn. Þau eru búin að vera á ferðalagi um heiminn í 3 vikur og fóru heim í morgun. Við notuðum tímann þeirra í Köben vel og tókum Tívolí með trompi í gær... turpas og öll tækin prófuð... eða svona næstum. Við nenntum náttúrulega ekki í barnatækin... Ólafur var samt samur við sig og fór ekki í neitt tæki. En hann vann höfrungabangsa handa mér... svo við erum á góðri leið með að koma okkur upp sædýrasafni ;o)

Svo er farið að styttast í Berlínarferð sem þýðir að það er mjög farið að styttast í að Ólafur yfirgefi mig... því miður. En svona er lífið. Hann kemur ekki til baka fyrr en í september... en ég lifi þetta af...

Vonandi hafið þið það bara sem best...
mvh. Eyja

Upptekið fólk í Danmörkinni

2008-05-28T21:13:00.005Z

Sæl veriði..

Það hefur aldeilis margt gerst síðustu daga hjá okkur skötuhjúum. Við héldum að sjálfsögðu Eurovision-partý eins og lög gera ráð fyrir á laugardagskvöldinu og mættu Maja og Hildur, vinkona Maju, hingað til okkar í mikla átveislu. Við höfðum mismunandi skoðanir á lögunum en öll vorum við sammála um að spá Úkraínu sigri, Rússinn var ekki nálægt efstu sætunum í okkar spám.

Á mánudaginn skellti ég mér svo í eins og eitt próf í DTU....4 tíma skriflegt próf um GMP sem var alveg þrælskemmtilegt. Þar sem ég var svo duglegur í prófinu (reyndar ekki búinn að fá út úr því) skellti ég mér svo í golf í dag ásamt Jóni Ragnari, Hödda og Daða úr stórklúbbnum Ísborgu. Það var mjög gott veður, sólskin og í kringum 20°C. Hins vegar var töluverður vindur, eða hið svokallaða Leirulogn (as in Leiran í Reykjanesbæ) sem gerði okkur svolítið erfiðara fyrir. Ég stóð mig nú samt sem áður ágætlega og náði að lækka forgjöfina mína niður í 20,6. Allt að gerast í golfinu.

Næstu daga verður svo aldeilis mikið að gerast. Á morgun förum við að hjálpa dönskum vinum okkar að flytja og tekur það væntanlega allan daginn.

Á föstudaginn mætir svo pabbi og Guðni ásamt ömmu og systkinum pabba í helgar-/afslöppunar-/skemmtiferð. Það verður margt brallað skemmtilegt um helgina og ekki verra að það er spáð gríðarlega flottu veðri, sól og allt upp í 28°C.

Á sunnudaginn fer síðan Eyja upp í flugvél og verður þar í svona ca. 16 tíma. Hún ætlar að skella sér til Fjólu í San Fransisco og verður þar í um vikutíma. Planið hjá þeim er að ná að slaka á og versla (væntanlega) og mála bæinn rauðan eins og þeim er einum lagið.

Hér má sjá sýnishorn af San Fran þar sem þær Eyja og Fjóla verða að þeysast um á bílaleigubílnum.

Á mánudeginum fara svo amma og systkini hans pabba aftur á Klakann, væntanlega kaffibrún eftir sólina í Köben. Pabbi og Guðni ætla að vera svolítið lengur hér í Danmörkinni þar sem planið er að byrja golfseasonið fyrir alvöru á þriðjudeginn. Við ætlum að reyna að spila töluvert mikið golf og erum meira að segja búnir að panta okkur 3 daga "miniferie" á Countrygolfclub á Jótlandi, nánar tiltekið við Álaborg. Þangað förum við á miðvikudeginum.

Hér má sjá eina af holunum á öðrum vellinum, en 2 átján holu golfvellir eru í boði á svæðinu :)

Sem sagt skemmtilegir tímar framundan hjá okkur skötuhjúum og því verður varla mikill tími fyrir blogg fyrr en einhvern tímann í Júní :)

Með kveðju úr sumarveðrinu á Danmörku,

Óli

Eurovision-maraþonið

2008-05-23T19:28:00.002Z

Já krakkar mínir... það er mikill spenningur á mínu heimili yfir Eurovision... og það er ekki ég sem er spennt bæ ðe vei. Ólafur er náttúrulega doldið spes :o) Mig vantaði fast forward takkann inn á milli þarna í gærkvöldi...

Annars var það góða við þessa keppni tvímælalaust Daninn. Hann er sko sætur maður... Ég hafði ekki séð hann áður og ekki heyrt lagið eða neitt en mæ ó mæ... Svo var hann með axlabönd. Það er eitthvað með mig og axlabönd... hef samt enga skýringu á því hvað það er. Og Ólafur á ekki einu sinni axlabönd... skil ekkert hvernig hann náði í mig :o) hehe...

Yfir í annað... það er ekki að verða nema vika í ferðalagið yfir 1/3 af hnettinum... er svo spennt. Og Fjólan er búin að setja upp rosa plan... ætlum sko aldeilis að hafa það gott...

En fyrst er það síðasti hlutinn af þessu rosalega Eurovisionplani... því betur komst Daninn í úrslit... hehe

Brjálað að gera...

2008-05-21T20:04:00.003Z

Já... það er alveg vitlaust að gera hérna hjá okkur þessa dagana... og þess vegna hefur bloggið eikka setið á hakanum. Við erum búin að vera í matarboðum og afmælum og ég veit ekki hvað og hvað inn á milli þess sem við erum að borða paradis-ís. Án efa sá besti sem boðið er upp á í Köben. Ólafur er líka á leiðinni í próf og gerir það fyrir mig að dunda sér við að læra fyrir það þessa dagana. Málið er nefnilega að ég er stressuð þó að mín próf séu nánast liðin tíð og ekkert í vændum þetta vorið, ég er bara stressuð fyrir hans hönd. Svo það er eins gott að maðurinn læri ;o)

Svo er Eurovision-maraþonið náttúrulega hafið... og haldiði ekki bara að einn af mínum uppáhaldsskautadönsurum hafi birst í Eurovision. Hann gat að vísu ekki sýnt alveg hvað hann getur því svellið var svo lítið... en hann er samt svona nördalega kúl! Og þetta heldur víst áfram á morgun og á laugardaginn þó svo að það fari ekki mikið fyrir þessu hér ef miðað er við allt sem stendur til í sambandi við kóngabrúðkaupið sem einnig er á laugardaginn. Það er standandi bein útsending frá því aumingjas brúðhjónin fara á fætur og nánast þangað til að þau fara að sofa... það er sko jafngott að vera ekki royal verð ég nú bara að segja...

Annars erum við alltaf að læra eikka nýtt hérna megin við hafið og er það nýjasta...

flödebolle með marsípan botni... OMG það er sko gott... slef,slef! Við vorum ekki lengi að stúta 4 svoleiðis sem stelpurnar færðu mér um daginn. Ég var svo góð að gefa Ólafi með mér nebblega... íhugaði það samt lengi vel að borða þær bara allar sjálf!

Annars bara bestu kveðjur úr Danaveldi...
Eyja

Étinn lifandi...

2008-05-10T19:16:00.004Z

Jæja, vegna fjölda áskorana (frá Siggu) kemur hér örstutt blogg......

Nú er sumarið heldur betur gengið í garð hér í Danaveldi og hitinn fer vart niður fyrir 20°C. Sólin skín jafnframt alla daga, eitthvað sem næpuhvítir Íslendingar eru alls ekki vanir.

Alltaf gaman að lesa svona veðurlýsingar frá Íslandi, ekki satt??

Annars er það að frétta að ég var nánast étinn lifandi síðastliðið fimmtudagskvöld. Var ég staddur í Valby að spila knattspyrnuleik akkúrat í ljósaskiptunum (eða á milli 19:00 og 21:00) og lenti þá í hatrömmu stríði við agnarsmáar mýflugur. Eftir að hafa staðið aðeins í 10 mínútur kyrrstæður eftir leikinn var ég bitinn án efa 30 sinnum á litlu svæði á löppunum. Ætla að sýna ykkur hryllingsmynd af þessu:

Fann ekkert fyrir þessu fyrst náttúrulega en síðan í gærkvöldi byrjaði kláðinn...úffffff. Og ekki skánaði það þegar kláðastillandi safinn kláraðist. Nóttin var því frekar vonlaus hjá mér, lét eins og lítill hvirfilbylur í rúminu að reyna að finna einhverja stöðu sem mér myndi klæja minna í. Það gekk ekki vel....fór því á röltið nokkrum sinnum yfir blánóttina til að reyna að finna EITTHVAÐ til að minnka kláðann. Gekk heldur ekki vel.... Var ég því frekar þreyttur þegar ég mætti á fótboltaæfingu klukkan 10:00 í morgun.

Nú er ég hins vegar búinn að fylla vopnabúr mitt af ýmsum smyrslum, töflum og kláðastillandi safa....nú mega þær koma ef þær þora :)

Annars erum við skötuhjú á leið yfir til Svíþjóðar á morgun í fjölskyldugrill hjá Halla og Yeldu þar sem þessi litli grallari verður án efa hrókur alls fagnaðar:

Setti fleiri myndir inn á nýju myndasíðuna okkar, sjá link hér til hægri.

Sólarkveðja,

Óli

Sólstingur

2008-05-04T20:08:00.006Z

Já... ætli það sé ekki að verða kominn tími á annað update frá Köben. Héðan er allt gott að frétta, lífið gengur í rólegheitunum sinn vana gang svo við höfum ekki yfir miklu að kvarta. Svo hefur veðrið skartað sínu fegursta undanfarna daga svo það er farið að jaðra við sólsting á Dalstrikinu. Erum búin að taka picnic í Fredriksberg Have og dag í Tivoli um helgina í tilefni góðviðrisins. Og undirrituð skellti sér í hæstu hringekju í heimi (það þýddi sko ekkert að draga Óla með frekar en venjulega)... Þetta var ágætis tæki, en þetta var samt ekki nógu mikill hasar fyrir mig sko, þetta var bara eins og MJÖG há róla og eins og veðrið var í dag þá var útsýnið yfir Kaupmannahöfn náttúrulega alveg æði :o) Hef ekki enn slegið út "öfuga teygjustökkið" með Ásu á Benidorm forðum, það er enn bilaðasta tivolitæki sem ég hef prófað.

Yfir í annað... þá hefur kannski frést að ég splæsti annarri hendinni í flugmiða til SF og er á leiðinni í heimsókn til Fjólu. Hlakka ekkert smá til auk þess sem Fjóla er að setja upp rosalegt plan. Við eigum sko aldeilis eftir að mála SF rauða þessa daga sem ég stoppa. Svo er ég líka búin að kaupa miða til Berlín þar sem ég ætla í helgarfjölskyldumeeting síðustu helgina í júní. Þegar þessu er lokið tekur svo endaspretturinn við í skólanum... sem er pínu scary! En það hlýtur að reddast, alla vegana á endanum :o)

Óli ætlar svo að yfirgefa mig í lok júní... um svipað leyti og lestinni sem keyrir hérna framhjá verður lokað í mánuð. Ég er ekki spennt... það tekur í dag rúman klukkutíma að komast til Risö en þegar lestin verður ekki til staðar heldur bara tog-busser þá verð ég líklega bara að flytja með svefnpoka á skrifstofuna... Ég get hreinlega ekki beðið! Spurning um að troða sér bara í tjald á Hróarskelduhátíðinni og fara ekkert þegar hátíðin er búin?

Þangað til næst...
sumarkveðjur úr DK
- Eyja

Update frá DK

2008-04-22T22:07:00.004Z

Sæl veriði.

Smá update af okkur skötuhjúum:

Við fórum í svakalegustu fermingarveislu sem sést hefur síðastliðinn föstudag sem stóð yfir frá klukkan 14:00 - 23:00 með aðeins 6 réttum og viðeigandi guðaveigum. Alveg svakaleg veisla sem heppnaðist mjög vel.
Ég er búinn að spila 3 fótboltaleiki síðan á föstudaginn, sá fyrsti í bikarkeppni utandeilda í Kaupmannahöfn sem vannst 6-1 (11 manna bolti), einn æfingaleikur sem endaði 3-3 og svo einn í deildinni við hörmulegar aðstæður í Valby sem tapaðist 3-1.
Fórum á magnaðan Thailenskan veitingastað á laugardagskvöldið sem ber nafnið Alyssa. Hann er nálægt Fiolstræde og Studiestræde og það er alveg óhætt að mæla með þeim stað. Svakalega góður matur.
Hittum Árna Hrannar og bróður hans á stórbarnum O'learys yfir frekar leiðinlegum fótboltaleik á laugardeginum (Wigan - Spurs).
Eyja búin að vera dugleg að vinna/læra úti í Hróarskeldu, fer út freeeekar snemma eða um 7 leytið og er ekki kominn heim fyrr en um kvöldmat.

S.s. bara allt við það sama héðan frá Mörkinni.

Annars vil ég endilega benda fólki á að ef það vill gefa mér eitthvað fallegt að þá væri ég meira en til í þetta úr hér að neðan. Mitt gamla Diesel úr gaf nefnilega upp öndina fyrir ekki svo löngu síðan og nú veit ég því ekki hvernig tímanum líður :)

Síðan er kappinn á leiðinni í golf í fyrramálið með drengjum úr fótboltanum. Maður verður nú að nýta góða veðrið á meðan það er til staðar, ekki satt?

En jæja, nóg af bulli í bili....

Yfir og út.

Góðar minningar...

2008-04-16T21:05:00.014Z

Sæl veriði..

Við skötuhjúin vorum að renna í gegnum misgamlar myndir í myndahrúgunni okkar. Ákváðum að deila með ykkur nokkrum sýnishornum. Síðan detta væntanlega fleiri inn á myndasíðuna góðu...

Benedikt Máni, 2006.

Frú Borghildur í Flatey, 2006.

Prinsinn nýútskrifaður, 2006.

Sólarlag á Skjálfanda, á leið úr Flatey.

Óli og Rúnar mjög heilbrigðir á Spáni, 2006.

Fjóla og hrossið, 2006.

Eyja sailor með Kinnafjöllin í baksýn, 2006.

Greinilegt að við eigum mikið af myndum síðan 2006.

Med venlig hilsen,
Óli & Eyja

Stundin er runnin upp...

2008-04-09T18:16:00.002Z

....Rómarmyndirnar eru komnar inn á myndasíðuna. Alls 243 myndir.
Ég vona að einhver endist í að skoða þær allar saman. Fyrir mjög áhugasama eigum við ca. 500 myndir fyrir utan þessar í viðbót frá Rómarferðinni :)

En þessar myndir er hægt að skoða hér

Kv. ÓliG

Afmælisblogg

2008-04-07T21:42:00.006Z

Í dag, þann 7. apríl 2008, eru 14 ár síðan litla systir mín hún Helga kom í heiminn. Við skötuhjú hér í Danmörkinni vildum óska þessum þverflautu-/saxafóns-/fótboltaspilara til hamingju með árin 14 og við hlökkum til að sjá þig síðar á Íslandi (já, nú eða bara hérna í Köben).

Hérna er smá sýnishorn af litlu dúllunni. Ekki kannski besta myndin sem til er, en mynd engu að síður.

Til lykke med fødselsdagen min lille søster! Ha' det godt på fødselsdagen og selvfølgelig også de følgende dage og uger. :)

Så, hvad siger I? Skal jeg og Eyja måske bare blog på dansk, eller vil I bare ha' det på islandsk?

Med venlig hilsen fra Dalstrøget,

Eyja og Óli

Eitt góðverk á dag kemur skapinu í lag...

2008-04-06T20:55:00.006Z

Í dag, sunnudag, vaknaði ég kl. hálf tíu, klæddi mig, borðaði og tölti svo af stað með vinkonu minni að taka þátt í landssöfnun Kræftens Bekæmpelse. Við sáum það að við gátum alveg gefið 2 tíma á sunnudagsmorgni í að rölta um hverfið og safna pening sem síðan fer til rannsókna og baráttu gegn krabbameini. Annars hefði maður bara legið sofandi og það er náttúrulega bara tímaeyðsla... Ástæðan fyrir því að við tókum þátt er ekki síst sú að fyrir viku síðan dó einn prófessorinn sem kenndi okkur í KU úr krabbameini og mamma hennar Helle sem ég er að vinna verkefni með er að berjast við þennan sjúkdóm fyrir svo utan alla hina sem maður þekkir. Og ég stend í þeirri trú að það sem Danirnir finna fram til skilar sér líka til Íslands. Svo nú get ég farið að sofa með góðri samvisku sérstaklega þar sem þessi söfnun setti met! Það munar sko um mann :o)

Þjóðverjar eru nú soldið spes......

2008-03-30T12:13:00.005Z

Við skötuhjúin sátum uppi í sófa í gærkvöldi og horfðum á eina ræmu. The Italian Job, mögnuð mynd. En það var nú ekki ræman sem hvatti til bloggfærslu að þessu sinni, heldur það sem blasti við okkur á einni af þýsku stöðinni þegar ræman kláraðist...

Þannig er mál með vexti að eins og allir vita eru Þjóðverjar mjög hrifnir af alls kyns skemmtiþáttum þar sem þjóðþekktir einstaklingar mæta í eitthvað sprell, svolítið eins og Á Tali með Hemma Gunn hérna í gamla daga, nema töluvert mikið hallærislegra.
Þáttastjórnandinn var að sjálfsögðu með sítt að aftan í gulljakka, hrikalega töff, og gestirnir voru ekki af verri endanum. Þarna sátu t.a.m. Paris Hilton í sófanum ásamt Oliver Kahn, landsliðsmarkvörður þýska landsliðsins, ásamt fleirum minna þekktum (eða ég þekkti þá ekki). Að sjálfsögðu er einungis töluð þýska í þessum þáttum nema þær örfáu spurningar sem beindust til ungfrú Hilton. Svörum hennar var hins vegar snarað jafnharðan yfir á þýsku.
Eftir nokkra mínútu áhorf æsast hins vegar leikar til muna, áhorfendaskarinn í stúdíóinu heldur vart vatni yfir spenningi...nú var eitthvað gríðarlega spennandi að fara að gerast!!
Ekki slökkti maður á kassanum þegar þarna var komið, svo mikil var spennan og ég næstum jafn spenntur og áhorfendurnir í sjónvarpssal...

Í salinn gengur sólbrúnn karlmaður á miðjum aldri sem kveðst heita Helmut (segjum það bara...man ekki hvað hann heitir) og vera frá Lichtenstein. Hlutverk hans Helmuts í þættinum var s.s. að undirgangast veðmál. Veðmálið snérist út á það að hann átti að reyna að þekkja svona venjulega fótbolta í sundur (það voru 30 stk á einu borðinu) með bundið fyrir augun. Hann átti að segja nákvæmlega um hvaða tegund þetta var og hvaða undirflokkur (þ.e.a.s Adidas Roteira t.d.) og átti að fá 5 tilraunir og varð að geta 4 rétt af þeim.

Þetta var svo sem ekkert óvanalegt, nema hvað að til þess að þekkja þá í sundur ætlaði hann Helmut að nota aðeins tunguna!! Já, þið heyrðuð rétt...tunguna!!!!

Þarna sat s.s. miðaldra karlmaður frá Lichtenstein og sleikti boltana í gríð og erg á meðan salurinn urlaðist af spenningi. Hann stóðst veðmálið með miklum myndarbrag og gat giskað á 4 bolta í röð niður í deilitegundir (eða þannig).

Hér gefur að líta einn af boltunum sem hann giskaði á rétt....þessi er samt þurr!

Þarna erum við að tala um gott sjónvarpsefni!!

Kv. Óli G

p.s. Rómarmyndirnar eru langt á veg komnar, verklok á áætlun!

Aftur í Köben

2008-03-25T20:26:00.005Z

Sæl veriði.

Jæja, þá erum við komin aftur til Köben eftir afar fínt páska"frí" á Íslandi. Það markverðasta sem gerðist í páskafríinu var að sjálfsögðu ferming litlu systur. Haldin var heljarinnar veisla á Norðurvangi og var fullt hús af frændfólki og vinum. Afar skemmtilegt. Fermingarbarnið, ef barn skal kalla, var held ég mjög lukkuleg með þetta allt saman.

Annars voru öll kvöld og dagar upppantaðir og náðum við alls ekki að hitta alla þá sem við vildum og ætluðum okkur að gera í þessari ferð. Ég verð því að standa mína pligt í sumar þegar ég mæti aftur á klakann og hitta alla sem við misstum af í þessum túr.

Það sem stóð upp úr hjá mér í þessum túr, fyrir utan náttúrulega að hitta fjölskylduna, var flugferð sem Einar Aron vinur minn bauð mér í á föstudaginn langa. Hann er held ég búinn að bjóða mér einu sinni á ári í næstum 10 ár í flugferð með sér, eða allar götur síðan hann fékk einkaflugmannsprófið, og ég hef alltaf hætt við á síðustu stundu (s.s. ekki þorað).

Í þetta skiptið skellti ég mér með honum (væntanlega mest Eyju að þakka þar sem hún sagðist ætla að fara ef ég myndi ekki fara) og í dag sé ég ekki eftir því. Þetta var mjög skemmtileg lífsreynsla og veðrið var alveg frábært. Þó verð ég að ég viðurkenna fúslega að ég var frekar smeykur á stundum þegar teknar voru frekar krappar beygjur (ég vil meina 60° beygjur, en ég held þær hafi nú ekki verið svo krappar). Ælupokinn var með í för en ég hélt í mér og brúkaði hann ekki....maður getur ekki farið að kasta upp í klefa sem rétt rúmar 2 menn!!

Fyrst þegar ég sá vélina sem við ætluðum að fljúga hélt ég að Einar væri að grínast. Ég hef held ég aldrei séð svona litla flugvél áður og var svona á báðum áttum að hætta við þetta allt saman. En ég þrjóskaðist við...sem betur fer.
Það voru teknar 4 snertilendingar á Keflavíkurflugvelli þar sem við lentum meðal annars á eftir Boeing 787 þotu, nokkrar dýfur yfir sumarbústað foreldra Einars við Apavatn og svo almennt útsýnisflug.

Heimahöfn nálgast.........Reykjavík í augsýn!

Fyrir áhugasama er hægt að sjá fleiri myndir úr túrnum með því að smella á þennan link .

Eins og glöggir lesendur sjá er ég s.s. búinn að útbúa aðgang að flickr.com fyrir okkur og kem ég til með að henda slatta af myndum þar inn, t.d. frá Róm sem margir hafa beðið spenntir eftir (að minnsta kosti þessar örfáu hræður sem commenta hjá okkur).

Þessa stundina er ég s.s. að því að græja allar 800 myndirnar sem teknar voru í Róm svo að hægt sé að henda þeim á veraldarvefinn. Áætluð verklok eru í byrjun apríl 2008........en engar dagsektir hafa verið settar á verkið.

kv. Óli G

Jæja... jæja...

2008-03-12T20:25:00.002Z

Nú er sko allt að gerast... Við erum að koma heim á klaka... ekki seinna en á morgun...

Gleðilega páska allir saman...

Afmælisblogg

2008-03-07T20:59:00.004Z

Í dag á frú Borghildur Ína afmæli. Að hennar sögn eru árin gríðarlega mörg, eða 24 ár, sem er nú alls ekki svo mikið miðað við gamla manninn hérna á kantinum.

Sýnishorn af gömlu, gömlu.

Við skötuhjú í Danmörku óskum þér til hamingju með afmælið Ína mín og við hlökkum til að sjá þig í næstu viku :)

Annars höldum við áfram að plögga nýju fötunum hennar Ínu í Hagkaupum. Skv. áreiðanlegum upplýsingum er allt að tæmast í hillum Hagkaupa og því fer hver að verða síðastur til að tryggja sér fat/föt úr fyrstu sendingu. Hægt er að sjá úrvalið í verslunum Hagkaupa eða með því að klikka á linkinn hér.

Hilsen,

Óli

Nóg að gera

2008-03-03T20:08:00.007Z

... þó svo það heyrist lítið frá okkur! Við erum bara svo busy people :o)

Það helsta sem gerst hefur undanfarið er að Gunnar komst að lokum á leiðarenda og var hjá okkur fyrir rúmri viku síðan. Elvar vinur hans kom líka í heimsókn frá Trige, þó svo ferðin hafi frá Trige hafi nú ekki gengið eins og best verður á kosið. Undir venjulegum kringumstæðum tekur ferðin þrjá tíma, en þar sem einhverjum fjörkálfi fannst geðveikt sniðugt að skilja eftir pakka á einni af lestarstöðunum á leiðinni varð ferðin 6 tímar í staðinn. Löggan tekur svona spaugi ekki létt... Annars var nú ýmislegt brallað þessa helgina sko, við heimsóttum bæinn og fórum út að borða, komum við í Christianiu og Experimentarium auk þess sem skytturnar þrjár fóru í partý og máluðu Köben rauða aðfaranótt sunnudagsins. Skildist að pulsusalinn sem þeir heimsóttu á Striknu hafi séð það undir eins að þeir væru Íslendingar plús að þeir borðuðu 3 McDonald hamborgara í eftirrétt eftir risapulsu. Heimferðin var þess vegna ekkert til að hrópa húrra fyrir hjá honum litlabró, sérstaklega þar sem IE bauð upp á hátt í 3 tíma seinkun þetta sunnudagskvöldið ;o)

Þessi mynd er sem sagt tekin áður en timburmennirnir náðu almennilegum tökum á skyttunum þrem!! Í þessari miklu ferð kynnist Gunnar líka kyllekylle og mér skilst að hans sé sárt saknað...

Stuttu eftir að þessu partýi lauk var komið að næsta fjöri. Og það var sko ekkert síðra skal ég segja ykkur. Á miðvikudaginn rann nefnilega upp dagur sem mun seint gleymast. Við fórum að sjá Smashing Pumpkins. Og takk fyrir og góðan daginn... það var bara snilld. Þau spiluðu fullt af nýju efni eeeennnn þau tóku öll gömlu lögin sem ég hafði á óskalistanum og það var svoooo gaman. Mjög erfitt að lýsa þessu í skrifuðu máli... þetta var algjörlega had to be there experience!!

Og félagi Billy Corgan var í síðu silfur pilsi með einhverju fluffi og hann var svooo svalur. Og án þess að íkja nokkuð þá voru samtals 30 gítarar og bassar á sviðinu. Ég hef aldrei séð svona marga gítara og bassa samankomna á einu sviði. Og þeir voru bara hver öðrum flottari. Ég held næstum að ég sé enn með gæsahúð eftir þessa tónleika. Mæli eindregið með SP ef þið fáið tækifæri til að sjá þau!!!

En til þess að ánægjan með tónleikana entist ekki lengi þá uppgötvuðum við okkur til EINSKÆRRAR ánægju á fimmtudagsmorguninn síðasta að millifærslan frá Íslandi til Danmerkur sem ég setti í gang viku áður var ekki að skila sér. Þetta vakti einskæra lukku þar sem við áttum ekki fyrir húsaleigunni inni á danska reikningnum og það tók bæ ðe vei meira en sólarhring áður en peningarnir okkar fundust. Ég hef þess vegna ákveðið að hætta öllum viðskiptum við banka bæði íslenska og danska og fá mér bara solid bankahólf í Sviss. Þangað til sef ég með peningana mína undir koddanum, þá veit ég alla vegana hvar þeir eru!! Það hjálpar nefnilega mikið til við að borga húsaleiguna þegar þjónustufulltrúinn segir: "þessir peningar eru ekkert týndir, þeir eru hérna einhvers staðar, við þurfum bara að finna þá". En bara svo þið séuð með það á hreinu þá er erfitt að nota peninga sem eru hérna EINHVERS STAÐAR... UUUUUrrrrrrrrrrr hvað ég var ekki hress þessa daga...

Og af því að þetta var svo gaman þá veiktist Óli og síðan ég og við erum sem sagt búin að liggja með hor síðan fyrir helgi. Óli hristi þetta samt af sér og tók svona eins og heilsan leyfði þátt í fótboltamótinu Iceland Air Open um helgina og það lítur allt út fyrir að ég hafi heilsu til að takast á við Abaqus og aðra vini mína í meistaraverkefninu aftur frá og með morgundeginum! Og svo er bara stefnan sett á Ísland 13. mars... úlala

P.s. Fötin hennar Ínu systur eru að koma í Hagkaup núna í mars. Ég er búin að sjá myndir og þau eru geggjað fín!! Svo nú er um að gera að fara í Hagkaup fljótlega að shoppa!!

Fréttir frá DK

2008-02-18T21:28:00.004Z

Já... það er nú yfirleitt eitthvað að frétta hérna megin sko. Nú er það helst í fréttum að ég er minnst með þrjá plástra á fingrunum þessa dagana þar sem ég ræð ekkert við fínu hnífana sem við Óli fengum í jólagjöf (eru sko til að nota í eldhúsinu!!). Og í kvöld... eftir að ég missti næstum vísifingur hægri handar... er búið að setja mig í bann. Svo nú má ég ekki nota þá um óákveðinn tíma... sem hentar vel þar sem Óli verður þá bara að sjá um þessa hlið eldhússtarfanna í þennan óákveðna tíma ;o)

Svo er líka annað í fréttum. Hjólið mitt borðar gallabuxur. Fyrir svona 10 dögum síðan þá varð ég var við að það var að koma gat á uppáhaldsgallabuxurnar mínar. Ég gat svo sem alveg séð það á staðsetningunni að þetta voru hjólahnakksmeiðsli sem hrjáðu fínu gallabuxurnar en ég gaf mig ekki og hélt ótrauð áfram að nota þær. Svo vorum við Óli eitthvað að sprella þegar við vorum að labba heim úr lestinni í eitt skiptið og Óli þurfti endilega að fá að prófa að taka mig á hestbak... ég sá það of seint að hann gerði þetta að sjálfsögðu bara til að gatið á buxunum mínum yrði svo stórt að ég yrði að henda þeim... Þetta var mikill sorgardagur. Ég þurfti því að sætta mig við að eiga bara næstuppáhaldsgallabuxur og svo einhverjar sem eru sko bara svona semi. Nema þegar ég sveifla mér upp á hjólið síðasta föstudag hvað haldiði að gerist. Jújú... það kom gat á næstuppáhaldsgallabuxurnar og þær eru á leiðinni í ruslið. Svo nú er ég á náttbuxum (eðalnáttbuxurnar frá Fjólu!!) eða á föðurlandinum til skiptis, auk þess sem hjólið er í skammarkróknum, þar sem ég tími ekki að gata fleiri buxur í bili (er líka að verða uppiskroppa með buxur)...

Raunarsaga úr skólanum

2008-02-14T21:10:00.002Z

Jæja, sæl veriði. Gleraugnaglámurinn mættur á bloggið og allt að gerast. Ætla að hefja þetta á smá raunarsögu úr skólanum hjá mér sem gerðist í dag:

Þannig er mál með vexti að í GMP kúrsinum sem ég er í (ætla nú ekki að útskýra þann kúrs neitt frekar - Actavis fólk veit allavegana nákvæmlega um hvað ræðir) voru kennararnir svo sniðugir að draga í 5 manna hópa af nemendum sem hafa ólíkan bakgrunn. Þannig lenti ég í hópi með einum frá Grikklandi, 2 Dönum og 1 Indverja. Gríðarlega fjölþjóðlegur hópur þar á ferð.
Verkefni dagsins var að halda örlitla kynningu á heimaverkefninu (sem ég ætla nú ekki að fara út í) og höfðum við í hópnum skipt kynningunni niður í 4 hluta, þar sem annar Daninn (og eina stelpan í hópnum) var í sínu árlega skíðaferðalagi á Himmelbjerget (eða nánast).
Fyrstur tók til máls Grikkinn Antonios sem talar ekki sérstaklega góða ensku, en maður skilur nú samt svona nokkurn veginn hvað hann er að tala um ef maður einbeitir sér svolítið að hlusta á hann. Hann kláraði sinn hluta nokkurn veginn ágætlega. Næstur í pontu var yours truly og verð ég að segja eins og er, fyrirlestrar eru ekki mín sterkasta hlið (svo ég vitna í "my near death experience" í fiskalíffræðinni í gamla daga þegar við Rakel héldum fyrirlesturinn um hornsílin).
Komst ég þó þokkalega í gegnum þetta þó maður hafi stamað töluvert á sumum stöðum.
Næstur á mælendaskrá var annar daninn og hann gerði þetta bara þokkalega...allt í lagi með það. En svo var það rúsínan í pylsuendanum, Indverjinn Suresh.
Það er skemmst frá því að segja að ég efast stórlega um að nokkur lifandi sála hafi skilið hvað hann sagði. Þeir sem þekkja til Indverja og enskunnar þeirra (þ.e.a.s. talað mál-vitna alltaf í Tilda Bashmati auglýsinguna góðu sem tröllreið landanum hérna um árið) geta rétt ímyndað sér Indverja tala á öðru hundraðinu um einhverjar reglugerðir GMP. Og við, hópmeðlimir hans, áttum afar bágt með okkur þarna uppi við töflu og maður þurfti að berjast við hláturinn. Þegar maður leit svo í átt að áhorfendaskaranum, voru þau öll í svipuðum vandræðum!! En hann Suresh var mjög einbeittur, í sparifötunum og svoleiðis og horfði nánast allan tímann á kennarann sem gat lítið annað gert en að kinka kolli til samþykkis um að hann hafi skilið hann......sem ég efast reyndar stórlega um.
Lítil saga úr skólanum.....rosalega skemmtilegt..hehe.

Annars er næst á dagskrá að skella sér í golf næsta laugardag. Sigurbjörn, vinnufélagi minn í Actavis, er á leiðinni til Köben og þar sem hann er forfallinn golfari ætlar hann að taka golfsettið sitt með sér. Þó að spáin sé ekki sérstök (spáð um 3 stiga hita og glampandi sól á laugardaginn) ætlum við að þramma um völlinn góða og týna nokkrum boltum. Alls ekki leiðinlegt.

En þetta er ágætt í bili,

Hilsen........Óli

Dleraujun...

2008-02-10T18:12:00.000Z

Mér skilst að það ríki nokkur eftirvænting eftir að sjá nýju gleraugu húsbóndans...

Eins og þið kannski vitið þá hefur ekki náðst eðlileg mynd af Ólafi síðan digtal myndavélar komu til sögunnar... svo þið verðið að taka viljann fyrir verkið :o) En svona líta sem sagt nýju dleraujun út...

Svona var samt fyrsta myndin af honum...

Og það þurfti sko meira en tvær tilraunir til að ná efri myndinni...

Já...

2008-02-08T19:25:00.000Z

Það gerist alveg ýmislegt hjá okkur sko, við erum bara ekki sérstaklega dugleg að blogga.
Gunnar ætlaði að koma í heimsókn til okkar í gær en hætti við þegar hann var búinn að sitja í 10 tíma í Leifsstöð og kemur vonandi bara við betra tækifæri. Veðrið var víst frekar kreisí á klakanum... Svo við erum bara búin að vera með skeifu í dag en Óli fékk nýju gleraugun svo það bætti þetta aðeins upp!
Svo er mastersverkefnið að hefjast svona hægt og rólega... svo nú er virkilega farið að sjá fyrir endann á þessari skólagöngu... alla vegana í bili!
Annars er Óli bara upp í sófa að horfa á X-factor... ég næ honum líklega ekki þaðan neitt á næstunni :o) Svo ég ætla bara að halda áfram í tölvuleik...

Evrópumeistarar

2008-01-30T09:17:00.000Z

Já... haldiði ekki bara að Danirnir hafi orðið Evrópumeistarar í handbolta. Og það með tilþrifum. Við Óli erum búin að vera með handbolta í staðinn fyrir heila síðan við komum frá Róm og erum búin að skemmta okkur mikið. Og ekki skemmdi fyrir að Danir unnu fyrsta gull í handbolta karla á stórmóti. Og þvílíkar og aðrar eins móttökur sem þeir fengu þegar þeir komu heim drengirnir... það var ekkert smá. Við Óli erum orðin svo dönsk að við hoppuðum út um alla stofu þegar þeir komust í úrslitin og svo skelltum við okkur að sjálfsögðu niður á Ráðhústorg til að vera með þegar liðið mætti þangað til að sveifla verðlaununum sínum. Það var alveg ótrúleg stemming með flugeldasýningu og öllu tilheyrandi...

Annars er það helst í fréttum að borðtölvan er með uppsteit þannig að við erum ekki enn búin að koma myndunum frá Róm þangað svo bloggið frá Róm dregst aðeins. Svo erum við búin að kaupa okkur miða á Smashing Pumpkins 27. febrúar og hlökkum geggjað til!!!

25. janúar 2008

2008-01-25T14:17:00.000Z

Já... það líður töluverður tími milli blogga þessa dagana... við skulum segja að það sé vegna mikilla anna...

Annars lofaði ég síðast að ég myndi nú setja inn nokkrar myndir frá opinberri heimsókn pabba og mömmu til okkar og er ekki fínt að gera það í dag þar sem gamli kallinn á ammæli.

Í þessari miklu heimsókn fórum við að sjálfsögðu í jólatívolí

Maður gæti haldið að ég hafi verið í öðru loftslagi en gamla settið!!

Jólaskrautið í tívolí var að sjálfsögðu alveg æðislega flott!!

Svo skelltum við okkur í Parken... það fór nú kannski ekki alveg á besta veg, en við skemmtum okkur nú ágætlega þrátt fyrir það!

Og þarna erum við greinilega öll komin í sama loftslagið ;o)

Svo gerðum við okkur bara ýmislegt til dundurs plús að afmælisbarn dagsins borðaði fullt af illa lyktandi ostum...

Verst að lyktin og bragðið skilar sér ekki á mynd!

Og hér erum við að leggja af stað á flugvöllinn!

Þegar hér var komið sögu var pabbi kominn með fyrir hjartað yfir hvað þau hefðu keypt mikið af dóti! Mér fannst þetta nú ekki svo voðalegt... enda Ína rétt búin að vera á svæðinu ;o)

Og bara til hamingju með afmælið pabbi minn!!

Rómarferðin var síðan algjört æði en myndirnar frá henni koma síðar... það á eftir að taka tímana tvo að færa þær úr myndavélinni yfir á tölvuna því Ólafur var óður með myndavélina!

Þangað til næst... Chiao!

Eyja afmælisstelpa

2008-01-15T12:50:00.000Z

Jæja, ætli það sé ekki best að reyna að halda þessari blessuðu síðu uppi.
Margt og mikið hefur gerst síðan síðasta bloggfærsla leit dagsins ljós og það er allt of langt mál fara að telja allt upp sem hefur á daga okkar drifið. Þið verðið bara að hafa samband við okkur ef þið viljið fá update :)

Annars er það helsta í fréttum í dag að hún Eyja á afmæli í dag, 15. janúar. Mikið fjör og mikið gaman. Það verður kannski ekki mikið haldið upp á þetta í dag þar sem við erum á leið til Rómar, Ítalíu á fimmtudaginn næstkomandi og ætlum að vera þar í viku. Verður án efa skemmtilegt.

Vonandi kemur því ferðasaga ásamt mögulega myndum frá Róm eftir rúma viku.

kv. ÓliG

Allt að gerast...

2007-11-26T22:14:00.000Z

já við erum hérna ennþá... það er bara svo brjúlat að gera að við erum að drukkna. Til marks um það má nefna að við læstum útidyrahurðinni seinnipartinn á föstudaginn og opnuðum ekki aftur fyrr en í morgun. Sitjum sitt í hvoru herberginu með ferhyrnd augu eftir tölvuskjáagláp svo stuðið er að ná hæstu hæðum hérna á Dalstrikinu...

Mamma og pabbi eru komin og farin. Það var SVOOO gaman að hafa þau í heimsókn og við gerðum SVOO margt skemmtilegt... Sagan af því í máli og myndum kemur fljótlega... ég lofa. Og þau færðu mér fisk... ég elska fisk... alla vegana þennan sem pabbi veiðir, það er eitthvað alveg sérstakt bragð af honum ;o)

Annars er þetta ekki búið að vera góður dagur... það var snjór þegar ég vaknaði... hjólið mitt fékk flog á leiðinni heim úr skólanum svo ég get bara hjólað í 3. gír og það er sko ekki gaman þegar maður er bara á leiðinni upp í móti og á móti vindi. Já... það eru brekkur í Danmörku... þær eru kannski ekki eins brattar og sumar þarna heima... en þær ná hins vegar frá Panum og alla leið heim! Og skatturinn fór að bögga mig... mér leiðist skatturinn... hann er alltaf til í að hirða af manni peninga!

Ég er sko farin að sofa...

Opinber heimsókn Ínu og Rúnars

2007-11-11T20:56:00.000Z

Sæl veriði.

Ég hef fengið það mikilvæga verkefni að skrá niður það sem gert var með frú Borghildi og Herra Rúnari. Hér kemur stuttur en greinargóður útdráttur:

Ína og Rúnar lentu í Mörkinni afar stundvíslega á laugardeginum 27. október síðastliðnum. Mikill meðvindur var með flugvélinni, svo mikill meðvindur að við skötuhjú vorum ekki mætt á flugvöllinn til að taka á móti þeim á réttum tíma.
Við hittum á þau á endanum og þá var haldið heim á leið, fyrir utan afar stutt stopp á stórgóða "veitingastaðnu" Steff Houlberg þar sem við Rúnar vorum pulsaðir upp.
Ákveðið var að fara ekki í bæinn um leið og þau lentu...afar góð ákvörðun verð ég að segja. Farið var því á Dalstrikið þar sem úðað var í sig sælgæti og slakað á. Ákveðið var svo að fara út að borða um kvöldið á hinum margfræga ítalska stað "Italiano" á Fiolstræde. Leynigestur kom með okkur í matinn, enginn annar en poolarinn og vinnufélagi minn, Tryggvi. Hann var á leið til Liverpool að sjá Liverpool - Arsenal á sunnudeginum en ákvað í einhverju stundarbrjálæðinu að það væri sniðugt að vera eina nótt í köben áður.
Maturinn var alveg þokkalegur hjá þeim "ítölunum" en þó vantaði þjónasönginn ógurlega, þar sem okkur var plantað niður í kjallara. Eftir mat skrapp Tryggvi á röltið í Nyhavn á meðan við "gamla" fólkið fórum heim að sofa.

Sunnudagurinn var síðan heldur betur crazy. Eftir að hafa sofið út (allir nema Eyja þar sem hún var að læra um morguninn) fengu Eyja og Ína þá "snilldar"hugmynd að fara á einhvern Flóamarkað. Þessi flóamarkaður væri bara 2var á ári og því væri nánast nauðsynlegt að fara.Þá var haldið í'ann og eftir að hafa borgað sig inn (afar spes að borga sig inn á flóamarkað) blöstu við okkur svona ca. 1000 básar. Við Rúnar spottuðum fljótt helstu útgönguleiðir af markaðnum þar sem Kolaportið er bara ganga í garðinum (ens: Walk in the park) miðað við þessa hörmung. Endalausar raðir og stæður af notuðu dóti fötum og sumt algjört rusl.

Eitthvað keyptu þær systur sér á markaðnum, þó aðallega leirtau og kertastjaka (þar sem okkur vantar alltaf kertastjaka..yebb..I've been brainwashed!!).

Þar sem planið var að vera þarna inni í dágóðan tíma neyddust þær til að gefa okkur Rúnari pylsur til að halda okkur góðum. Þær voru meira að segja alls ekki góðar.

Eftir að hafa þrammað þarna sikk sakk á milli básanna í nokkra klukkutíma var okkur Rúnari nóg boðið og settumst við í eina sætið sem var í húsinu....stigann. Stelpurnar vorkenndu okkur svo mikið að við fengum bland í poka...

Á mánudeginum var Fields tekið með trompi. Visakortið hans Rúnars brann næstum yfir í North Face búðinni og í H&M og mitt kort fékk nú aðeins að finna fyrir því líka. Þar sem við Rúnar vorum á leiðinni á 2 tíma knattspyrnuæfingu um kvöldið gátum við "aðeins" verið að versla til hálf 7 þar sem ekki er æskilegt að borða rétt fyrir æfingu. Klyfjaðir pokum skelltum við okkur í Metroinn, átum og við Rúnar skemmtum okkur konunglega í bolta á meðan stelpurnar höfðu stelpukvöld.

Þriðjudagurinn var afar rólegur þar sem kæla þurfti Visa kortin niður, og Eyja neyddist til að vera í skólanum til hvorki meira né minna en 17:00. Ég var því að vinna langt fram eftir degi á meðan Ína og Rúnar horfðu á eins og eina seríu af House.

Á miðvikudeginum höfðu Visakortin náð sínu rétta hitastigi aftur og því var þrammað í bæinn. Mitt kort fékk að hvíla sig í veskinu á meðan kortið hans Rúnars fékk að finna fyrir því..
Ekki var gert meira þann daginn annað en að borða og slaka á.

Á fimmtudeginum fórum við Eyja í skólann fram á miðjan dag og er heim var komið var tekin sú mikla, og verð ég að segja góða, ákvörðun að Eyja og Ína ætluðu að mæla Fisketorvet út á meðan við Rúnar ætluðum að vera bara heima, þar sem aftur var komið að knattspyrnu. Við Rúnar fórum svo "rómantískt" út að borða á Fik-Ret og fengum okkur pizzu. Síðan var farið í knattspyrnu og svo í beddann.

Ákveðið var að eyða síðasta heila degi Ínu og Rúnars í köben í hinum stórgóða dýragarði. Þar sem ég var að vinna til hádegis var farið í Zoologisk Have um klukkan 1. Höfðum við því 3 tíma til þess að skanna garðinn.
Það gekk að sjálfsögðu eins og í sögu enda ég gríðarlega öflugur leiðsögumaður.
Eftir dýragarðinn var farið á stórteiknimyndina Ratatouille (þar sem rotta er kokkur - afar sérstakt) og var þetta ágætis ræma. Hins vegar mættum við frekar í seinna laginu og gátum við Rúnar því hvorki fengið popp né kók. Því fær þessi bíóferð ekki margar stjörnur...

Á laugardeginum var svo komið að brottför Í&R. Fyrst var farið að sækja milljónirnar þeirra í Tax Refund (þar sem leiðbeiningarnar eru á íslensku!!) og svo valhoppuðu þau út í vél.

Mjög ánægjulegt að hafa þau hérna hjá okkur, og ekki spillti íslenska nammið mikið fyrir. :)

Nú er næsta mál á dagskrá hópavinnuverkefni hjá okkur báðum og konungleg heimsókn næsta miðvikudag. Tengdaforeldrarnir ætla að heiðra okkur með nærveru sinni í rúma viku og getum við Eyja varla beðið eftir að sýna þeim allt sem Dalstrikið hefur upp á að bjóða; gamlar konur með göngugrindur, sólbaðsþvottahús (getur tanað á meðan þú þværð..ekki amalegt það) ásamt öðrum skemmtilegum fídusum.

Þar til síðar....

Óli

Á lífi...

2007-11-05T23:06:00.000Z

en erum þó enn að reyna að jafna okkur eftir alla gönguna í síðustu viku... Verðum að drífa í því þar sem næsta heimsókn er handan við hornið... Nánari lýsingar á síðustu heimsókn koma á kristilegri tíma einhvern næstu daga...

Annars átti litli bróðir afmæli í síðustu viku. Okkur Óla langaði bara til að segja til hamingju við hann svona eins og einu sinni enn. Það var víst mikið afmælisstuð hjá honum og hafa farið sögur af áteiknuðum netahlýrabolum og fleiru sem ekki er gott að tala mjög hátt um!

25. október

2007-10-25T06:50:00.001Z

Já haldiði ekki bara að þessi myndarlegi á myndinni eigi afmæli í dag! Langaði bara til að segja ykkur frá því og að sjálfsögðu að óska honum til hamingju. Myndin er tekin í sumar heima á Íslandi þegar hann var búinn að fá afmælisgjöfina frá mér. Við sáum fyrir okkur að þetta myndi hvort sem er ekki koma að neinum notum hérna megin við hafið þegar líða væri farið að jólum svo hann fékk þetta aðeins fyrir fram!

En alla vegana... til hamingju með daginn sæti ;o)

Og Óli fékk að fara í ZOO

2007-10-20T21:16:00.000Z

Það var nú hálf kjánalegt að vera í haustfríi og nota ekki góða veðrið til að fara í ZOO svo við skelltum okkur í heimsókn í gær. Þetta var voða fín ferð, en það bregst ekki, það er skítakuldi í dýragarðinum alltaf. Vorum í úlpu og með húfu og vettlinga auk þess sem undirrituð var að sjálfsögðu í sokkabuxum til öryggis og það veitti sko ekki af. Annars vil ég meina að ég hafi ekki verið minni attraction en dýrin... er nefnilega svo "heppin" þessa dagana að ég er með frunsu sem þekur hálft andlitið og vekur hún töluverða athygli. Það er ekki gaman...

Annars eru bara rólegheit hérna megin þar sem við þurfum að hafa nóga orku þegar Ína og Rúnar birtast... og það er ekki nema vika þangað til. Vona bara að Ína verði með smá geðheilsu eftir þegar þar kemur sögu, listinn sem hún er með yfir verkefni og aðra gleði sem ganga þarf frá í vikunni var svo langur að mig svimaði! Er hætt að væla í bili alla vegana...

Svo erum við búin að fjárfesta í flugmiðum heim um jólin og verðum á klakanum um miðjan dag 17. des. Svo verður haldið norður yfir heiðar mjög fljótlega upp úr því. Og þar sem Danirnir vinir mínir voru svo indælir að setja á eins og eitt ljótt próf rétt rúmlega áramót þá förum við aftur út 27. des!! Sem er náttúrulega bara rugl. En við eigum stefnumót við Halla og Yeldu um áramótin svo það lítur út fyrir að við verðum í Svíþjóð þessi áramót. Það verður gaman að prófa það ;o)

Vetrarfrí

2007-10-16T15:23:00.000Z

Já, við erum í fríi og það er snilld. Verst að maður verður automatiskt latur þegar maður er í fríi.

Annars er bara gott að frétta. Við hittum Magga á föstudaginn og fengum fullt af osti svo nú verður sko standandi pastaveisla fram að jólum. Maggi var bara hress, og mér skildist á honum að restin af þessum Fjölnismönnum væri jafnvel enn hressari. En ég veit ekki betur en að þeir séu allir komnir heim til Íslands meira eða minna heilir...

Helginni eyddum við síðan í rólegheitum í Malmö með Halla og Yeldu. Það var voða fínt og svooo mikil afslöppun. Pabbi hennar Yeldu rekur líka eina af sætari búðum sem ég hef komið í. Hann selur te og allt sem til þarf við að drekka te og ég alveg missti mig í búðinni. Sit núna eins og fín frú með nýjan bolla og margar tegundir af te-i ;o)

Svo er ég bara að reyna að berja Ólaf áfram við lesturinn. Það gengur hins vegar ekki neitt svo ég er að hugsa um að gefa það bara upp á bátinn. Það er nóg að vera bara stressaður yfir sínu eigins námi held ég :o) Veit heldur ekki hvort Óli sé neitt svo ánægður með þessa afskiptasemi mína... ef út í það er farið. Næst á dagskrá er samt að fara í Zoologisk have þegar hann er búinn að vera duglegur á minn mælikvarða... verður spennandi að sjá hvort það tekst... hihihi

Búðarslys!

2007-10-10T20:03:00.000Z

Jæja...leikurinn búinn.......FH meistarar en Fjölnismenn eiga hrós skilið fyrir árangur sinn. Nú verður maður að halda með 2 liðum í Landsbankadeildinni á næsta ári. :) Það gerir deildina bara enn skemmtilegri fyrir vikið.

Annars lenti ég í smá slysi í Nettó áðan. Málavextir voru eftirfarandi:

Við skötuhjú ákváðum að fara í okkar vikulegu verslunarferð í Nettó með langan lista af vörum sem átti að kaupa. Við fengum okkur körfu á hjólum til tilbreytingar svo við þyrftum ekki að rogast með allt draslið.

Þegar við höfðum týnt allt til sem var á listanum (og var fáanlegt í Nettó) ofan í körfuna, svigað fram hjá gömlu konunum með göngugrindurnar og vorum komin að kassanum, byrjuðu ósköpin...

Við tökum okkur stöðu við kassann og byrjum að hamast við að hlaða vörunum á færibandið í sameiningu svona svo að allt fólkið sem beið í röð myndi komast fyrr á kassann. Þegar síðan loks sást til botns á körfunni fór ég hinum meginn við kassann og byrjaði, af mikilli fagmennsku, að raða í pokana. Þarna vorum við að vinna okkur inn nokkrar góðar mínútur í millitíma...

Þegar ég hafði raðað í 3 fulla poka dundu ósköpin yfir....

Ég ákvað í flýti að sleppa einum pokanum, rétt á meðan ég myndi klára að raða í einn af hinum pokunum, og það hefði ég nú ekki átt að gera. Í þann mund sem ég er að snúa mér við sé ég útundan mér eitthvað hvítt á fleygiferð í áttina að gólfinu.

Þar sem ég er með viðbragð á við pardusdýr stökk ég í áttina að hvíta hlutnum, sem reyndist að sjálfsögðu vera einn af innkaupapokunum, og reyndi að bjarga því sem hægt var að bjarga. Það lukkaðist ekki betur en svo að sultukrukkan sem við höfðum fjárfest í, smallaðist yfir gólfið og allt góssið sem var í pokanum lenti að sjálfsögðu ofan í sultunni.

Þarna stóð ég því í miðjum sultupollinum, með fulla búð af óþreyjufullum gamlingjum sem allir biðu eftir því að komast heim að elda kvöldmatinn, og ég var að tefja þau.

Athugið: Sultukrukkan hér að ofan tengist málinu á engan hátt.

Það næsta sem gerist er að einn búðarsnáði kemur hlaupandi með pappír (ekkert skúringadót notað á þessum bænum) og þurrkar þetta samviskusamlega upp. Hann hélt í fyrstu að ég hafði slasað mig þar sem hendurnar voru löðrandi í sultu! En svo var nú sem betur fer ekki....

Mental note to myself: Næst kaupi ég sultukrukku í plastflösku.......eða læri hreinlega að raða í poka!!

Annars er töluvert mikið á döfinni næstu daga hjá okkur hjónaleysum: Menningarnótt næsta föstudagskvöld ásamt nokkrum hressum Fjölnismönnum (þó aðallega Magga), dagur í Malmö á laugardaginn hjá Halla og Yeldu og svo tekur próflestur (a.m.k. hjá mér) við.

Síðan er afar stutt í afmælið mitt (einmitt sama dag og ég fer í próf) og stuttu seinna megum við eiga von á fyrstu opinberu heimsókninni okkar í haust: Frú Borghildur og Rúnsi boy.

Yfirraðarinn kveður að sinni...

Bikarúrslit!!

2007-10-06T09:48:00.000Z

Í dag verða bikarúrslitin í Visa-bikar karla háð þetta árið. Úrslitaleikurinn er sérstakur vegna þess að til úrslita leika Fimleikafélagið og Fjölnir.
Á venjulegum degi myndi maður öskra áfram FH allan tímann og styðja mína menn, FH-ingana, í blíðu og stríðu.
Þannig er samt mál með vexti að mágur minn, Magnús Ingi, er fyrirliði Fjölnismanna þannig að nú er maður á báðum áttum hvað skal gera...

Hef ég að því tilefni gert dauðaleit í öllum sportvörubúðum í DK til þess að finna gula, hvíta og svarta treyju til þess að styðja bæði lið. Það hefur því miður lítið gengið......

Því hef ég ákveðið að horfa bara á leikinn á nærbuxunum.........

Áfram F(jölnir)H

Tónlist og fótbolti

2007-10-05T14:10:00.000Z

Jæja, ætli það sé ekki best að ég reyni að blogga eitthvað líka, svo að Eyja sé ein um þetta.

Það er markverðast í fréttum að síðastliðið miðvikudagskvöld skelltum við skötuhjú okkur á tónleika með Pétri Ben í Lille Vega. Áður en haldið var á tónleikana fórum við í "fyrirpartý" til Maju fyrrum starfsmann Actavis IS, núverandi starfsmann Actavis DK. Boðið var upp á dýrindis kjúklingasalat og meððí...afskaplega ljúffengt. Með í för voru Elsa Steinunn (fyrrum Actavis skvísa) og Karólína (sem tengist Actavis ekki neitt). Ég var s.s. eini haninn í hænsnahúsinu....gaman af því.

Tónleikarnir voru alveg hreint magnaðir. Pétur Ben ávallt góður og ekki skemmdi fyrir að Sigtryggur Baldursson (a.k.a. Bogomil Font) spilaði á trommur með Pétri Ben og Bogomil sá um skemmtiatriðin á meðan Pétur var að skipta um strengi í gítarnum. Að auki var einstaklega skrítinn, óþekktur (a.m.k. fyrir mína parta) bassaleikari, sem leit út eins og kjötbolla á 2 tannstönglum.....held hann hafi farið í gallabuxurnar svona um 1980 og aldrei farið úr þeim síðan....þrengri buxur hef ég aldrei séð!!

Ólöf Arnalds sá um að hita upp fyrir Pétur og stóð hún sig með stakri prýði. Afskaplega sérstök rödd en flott engu að síður.

Eina sem vantaði uppá að tónleikarnir hefðu fengið 5 diska af 5 mögulegum var sú staðreynd að það voru einungis sæti fyrir brot af tónleikagestum og því þurftu þeir sem mættu svona frekar í seinna fallinu (og við s.s. í þeim hópi) annað hvort að standa eða hreinlega að sitja á gólfinu. Nú, og þar sem Ólöf spilar kannski ekki mestu stuðtónlistina í bransanum settust allir á gólfið um leið og komið var inn.

Ég er hins vegar þeim eiginleikum gæddur (ef eiginleika skyldi kalla) að ég get með mjög illu móti setið á gólfi án bakstuðnings í lengri tíma en 10 sekúndur áður en maður stirðnar upp og fær náladofa. Það er jafnvel spurning um að fara bráðum að teygja á...þannig kemst maður allavegana í sokkana sómasamlega á morgnana!.

Tónleikarnir fá því 4 af 5 mögulegum diskum, félagsskapurinn fær 5 af 5.

Í gær fór ég hins vegar með 3 félögum úr stórklúbbnum Isborg Boldklub að sjá "Byens stolthed" FCK taka á móti Lens í Uefa Bikarnum. Þetta var alveg mögnuð upplifun fyrir mig þar sem þetta er í fyrsta skipti sem ég fer á svona stóran fótboltaleik með svona mikilli stemmningu. Áhorfendur voru 24 þús, þar af um 23.900 stk sem studdu heimaliðið.
FCK vann glæstan sigur á Lens í framlengdum leik, 2-1, þar sem Jesper Gronkjær skoraði sigurmarkið úr vítaspyrnu á 115 mín. Alveg gríðarlega spennandi leikur.

Við "sátum" í fremstu röð í Fona stúkunni og það ringdi hressilega á okkur allan tímann....en það kom ekki að sök því við skemmtum okkur konunglega. Læt fylgja hér eina mynd sem ég tók (algjörlega ekki í fókus) áður en batteríið í myndavélinni kláraðist.

Það lítur út eins og það hafi ekki verið neinir áhorfendur á myndinni en það var nú ekki þannig. Ef vel er að gáð má sjá glitta í stuðningsmenn Lens sem voru neðst í hægra horninu í stúkunni bak við markið. Það varð s.s. að hafa töluvert pláss í kringum áhorfendur Lens...

Jæja...þetta er komið gott......

Hilsen,

Óli

Á morgun...

2007-10-02T20:35:00.000Z

Það sem allir hafa beðið eftir með miklum spenningi... ja eða alla vegana við Óli höfum beðið eftir með ofvæni:
Tónleikarnir með Pétri Ben eru á morgun. Vúhú...

Fyrir utan það þá eru einungis eftir 8 skóladagar fyrir haustfrí... Júhú!

Og við eigum miða á Danmark - Island í Parken 21. nóvember... Jibbíkóla

:o)

Þreyta...

2007-09-24T20:36:00.000Z

í ganginum... hjá skötuhjúunum á Dalstrikinu.

Ég hef nú svo sem enga góða afsökun fyrir þreytu... fór bara of seint að sofa í gær og var svo að hjóla í skólann í dag í fyrsta skipti síðan fyrir veikindi nánast held ég...

Ólafur hins vegar tók þetta með stæl. Hann hjólaði í skólann með eitt kitkat með sér í nesti, fór beint eftir skóla að spila badminton við Torbjörn vin okkar (sem er bæ ðe vei víst nokkuð góður í badminton) og var svo svangur þegar hann loksins ætlaði að leggja af stað heim á hjólinu að hann varð að stoppa hjá Indverjanum í DTU og kaupa sér kex. Svo hjólaði hann heim í þvílíkum mótvindi að maðurinn ætlaði varla að komast heim... Og þreyttur var hann og er enn held ég. Mér skilst líka að hann sé nú þegar kominn með strengi eftir badmintonið ;o) Kannski rétt að taka það líka fram að hann heldur því fram að þreytan sé aðallega tilkomin vegna þess að hann þurfti að vakna 07:00 í gær (sem var sunnudagur) til að mæta í knattspyrnuleik... og það er sko ókristilegur tími á sunnudegi!!

Annars bara allt rólegt að frétta... bara brjúlat að gera í skólanum eins og stundum áður en allt í góðum gír!

Sjúkdómafræði...

2007-09-18T21:23:00.000Z

er ekki góð lesning fyrir manneskju eins og mig. Ég er búin að vera með nánast öll einkenni allra þeirra sjúkdóma sem ég hef lesið um til þessa og þetta hafa verið skemmtilegir sjúkdómar á borð við AIDS og hina ýmsu hjartasjúkdóma. Ég fékk verk sem leiddi út í vinstri handlegg hérna á tímabili hvað þá annað!!
Annars eru "alvöru" veikindin svona að yfirgefa mig hægt og rólega. Of hægt og rólega að mínu mati þar sem ég er ekki sú þolinmóðasta í heimi þegar kemur að því að liggja og gera ekki neitt. En þetta kemur...

Annars splæsti Óli í tvo miða á tónleika hjá þessum sæta þarna á myndinni 3. október næst komandi!!!
Ég hlakka geggjað til :o)

Svo til að þið heyrið nú sögur af Ólafi líka þá er hann náttúrulega ekki eins og fólk er flest! Hann kom ýkt ánægður heim úr tíma á mánudaginn og hafði lært fullt nýtt. En það var sko ekki í sambandi við skólann sem hann var að læra... neinei, hann hafði séð strákana fyrir framan sig vera að spila svona geggjaðan tölvuleik sem hann bara varð að prófa. Og nú situr hann daginn út og inn og spilar höfrungaólympíutölvuleikinn eins og vindurinn! Og þetta er ekki einu sinni nálægt því að vera spennandi eða skemmtilegur tölvuleikur... Og bæ þe vei þá var hann að ná nýju meti, 4,5 milljónir!!! Sumir eiga sér ekkert líf... hehehe

2007-09-17T13:45:00.000Z

Já... þetta er sko ekki búin að vera mín uppáhalds helgi skal ég segja ykkur... Ég er búin að vera lasin síðan á fimmtudagskvöld. Var hins vegar svo sannfærð á föstudagsmorgun að ég væri orðin hress að ég skellti mér í skólann... sem var líklega ekki það gáfulegasta sem ég hef gert! Fékk svo snyrtilega í magann eftir skóla á föstudaginn og er búin að vera að skemmta mér við það síðan þá. Og ég verð alveg að viðurkenna að ég er bara að verða svöng. En þetta fer vonandi að skána... þó svo það hjálpi aðeins við að eyða tímanum að glápa bara á Friends! Og svo er Óli náttúrulega búinn að vera svo indæll og hlaupa fram og aftur á milli búða til að reyna að finna eitthvað sem ég get borðað!! Hann er svo indæll þessi elska ;o)

Það er sem sagt ekki mikið í fréttum hérna megin við hafið. Nema hvað að það er byrjuð 4. serían af Vild med dans hérna hjá vinum vorum Dönum. Fyrir ykkur sem ekki þekkið þetta þá er þetta þannig þáttur að einn frægur Dani, sem bæ ðe vei kann ekki að dansa, dansar við einn alvöru dansara og svo er eitt par kosið út í hverri viku. Og það skemmtilegasta við þessa seríu er að hann Joachim Boldsen handboltakall er með og hann er svo skondinn karakter. Hann er risastór og mikill handboltajaxl sem er svo fyndið að sjá taka sporin að það er með ólíkindum. En hann gerir það nú svo sem alveg ágætlega eins og þið getið séð hér... neðst á síðunni!

En nú verð ég að fara og leggja mig... heyrumst - Eyja

Varúð!!!

2007-09-15T10:38:00.000Z

Eftirfarandi færsla er nær eingöngu fyrir golfáhugamenn og -konur!!!

Ég fór ásamt 3 fílhraustum karlmönnum í golf síðastliðinn miðvikudag í ágætis veðri (15°c og skýjað) á golfvöll sem heitir Furesoe Golfklub. Hann er staðsettur úti í sveit, nánar tiltekið í Birkeroed.
Völlurinn var gríðarlega flottur, skógi vaxinn og endalaust af djúpum sandgryfjum og tjörnum, eitthvað sem við áttum aldeilis eftir að finna fyrir þegar leið á daginn.
Þegar 3 holur voru búnar af 18 var ég búinn að týna a.m.k. 4 kúlum og var ekki að gera gott mót. Það var þó hægt að hugga sig við það að meðspilarar mínir (Gísli Herjólfsson, Höskuldur og Svenni) voru í svipuðum vandræðum og ég. Svenni var vani maðurinn á vellinum (a.m.k. á "loopunni" sem við tókum) og þegar hann byrjaði á að segja að hann hafi tekið 60 vara bolta með vissum við svona ca. hvað við máttum eiga von á.
Það er skemmst frá því að segja að höggafjöldinn var vel yfir hundraðið, týndir boltar voru á annan tug en spilagleðin hvarf engu að síður aldrei!!
Nú er næsta skref að æfa sig í stutta spilinu út í garði áður en haldið verður aftur út á golfvöll. Þar liggur kutinn í kúnni nefnilega..

Annars er allt fínt að frétta af mér. Er sestur aftur á skólabekk eftir rúmlega 4 ára veru á vinnumarkaðnum. Er reyndar bara í einum kúrsi sem heitir því skemmtilega nafni "Pharmaceutical Technology" og er að vinna með í Actavis 50%. Það gengur alveg ljómandi vel allt saman, þó það sé vissulega gríðarlega erfitt að þurfa að hlusta á 4 tíma fyrirlestur frá Þjóðverja sem er vanur að kenna á dönsku en kennir þennan kúrs á ensku. Þið getið rétt ímyndað ykkur hvernig enskan er hjá honum. Og hann heitir Gunther, sem er jafnvel enn fyndnara. :)

Næst á dagskrá er stórleikur Tottenham vs. Arsenal sem maður má nú ekki missa af....

Ha' det godt.

Hilsen, Óli

Jæja

2007-09-10T05:37:00.000Z

ætli það sé ekki kominn tími á að hressa aðeins upp á skrifin á þessa síðu...

Fyrir ykkur sem ekki vitið þá erum við Óli komin heim til DK og erum svona í aðlögun að því að þurfa að læra heima og solleiðis dót. Erum ekki búin að taka alveg upp úr síðustu töskunni en þetta kemur svona með kalda vatninu. Það er samt ekkert betra en að sofa í sínu eigin rúmi. OMG!

Erum búin að hafa nóg að gera, þó aðallega við að kveðja vini okkar sem eru annaðhvort að flytja heim eða fara í skiptinám þessa önnina. Þurfum samt að fara að íhuga það að snúa okkur að náminu... alla vegana ég!

Svo var mikið fjör hjá okkur í gær þegar við vorum að fara að sofa. Við rákumst á kónguló á stærð við mús á baðinu... jakkkk!

Ég er venjulega ekki mikið að kippa mér upp við kóngulær og tek bara í einn fót og sveifla þeim út. En í gær þá hafði ég ekki mikinn áhuga á því. Hún leit einna helst út fyrir að ætla að borða mann... Svo ég skipaði Óla að drepa hana en hún hefur örugglega heyrt það og hljóp af stað sem þýddi það að ég stökk skrækjandi út af baðherberginu og hrekkti Óla svo að hann fór líka að skrækja. Þetta var soldið skondið. En eftir að Óli lamdi hana með tveimur mismunandi auglýsingabæklingum og við vorum búin að bíða í smá stund þá þorði ég að hreinsa hana upp af gólfinu og hún leit svona út...

Jakk..... ég er enn með hroll!

Sumarið er tíminn

2007-07-02T23:20:00.000Z

þegar Eyja og Óli eru geggjað léleg í blogginu. Við erum bæði að vinna og sofa þessa dagana en lifum samt eins og kóngur og drottning í ríki okkar heima hjá Kolla og Biddý. Erum ekki lítið þakklát fyrir að hafa smá þak yfir höfuðið út af fyrir okkur.
Annars bara allt í gúddí fíling. Óli er búinn með 2 brúðkaup og ég eitt, við erum búin með eitt ættarmót og kannski fæ ég annað, Óli er búinn með eina veiðiferð og nær alla vegana einni ef ekki tveimur í viðbót. Og svo verður það Verslunarmannahelgi í Flatey. Við höfum sem sagt plentý að gera og tíminn líður geggjað hratt. Svo hlökkum við nú líka smá til að fara aftur "heim" til Köben þar sem dótið okkar er eins og staðan er í dag. En Ísland bregst ekki og svo er veðrið búið að vera svo fínt ;o)
Nýjast er samt að ég náði ljóta prófinu og er nú í samningaviðræðum við lín. Það er sko alltaf fjör ;o) Og Óli fékk inni í DTU svo nú verðum við bara saman í skóla í vetur ;o)

Annars sendast bestu kveðjur til Fjólu í Sviss... hlakka mikið til að fá þig heim gamla!

Kv. Eyja

Heima í heiðardalnum...

2007-06-10T12:24:00.000Z

Já... ég er heima á Húsavík og það er sko ekkert betra en afslöppun norður undir heimskautsbaug. Var samt á tímabili hætt við að koma heim í sumar, það er nefnilega búið að vera um og yfir 30°C í Köben frá því á miðvikudag. Það var smá munur að mæta heim á klaka í 10°C. Annars er nú alltaf gott að koma heim. Og ég er sem sagt búin að vera fyrir norðan síðan á föstudag og er búin að ná að slá lóðina og kaupa sumarblóm til að stoppa í blómabeðið með mömmu. Pabbi er nefnilega í verklegum framkvæmdum og náði að drepa helminginn af sumarblómunum sem voru komin niður ;o) Svo er bara búið að borða og sofa og horfa á vídeó með múttu og pápa svo þetta er algjört æði. Ólaf hef ég hvorki heyrt eða séð síðan á föstudag... hann er einhvers staðar inni á Landmannaafrétti að drepa saklausa fiska sem eiga sér einskis ills von. Býst samt við honum í símasamband í dag. Svo hefst alvaran á miðvikudaginn... á víst að mæta í vinnuna þá... en ég fæ Greifapizzu hjá ömmu og afa á Akureyri á leiðinni suður svo ég hlýt að lifa af... hehe. Ekkert betra en að fara norður í almennilegt dekur!!

Oó

2007-06-03T13:19:00.000Z

Já, nú er eins gott að þið beinið öllum ykkar góðu husunum í áttina að Köben á morgun á milli 9:00 og 13:00 að staðartíma... því á morgun rennur upp 4. júní...

Ojjj geitungur

2007-05-30T21:00:00.001Z

Ég fékk gest í gær. Það kom í heimsókn geitungur sem hafði ekkert gott í huga. Hef þess vegna ákveðið að hafa hárspreyið við hliðina á tölvunni þangað til próflestri líkur... ég tek enga áhættu í svona málum (líffræðingurinn er heldur ekki heima...)

Advanced biomechanics...

2007-05-27T14:07:00.000Z

55 fræðigreinar um allt á milli himins og jarðar í biomekanik
4 tímar skriflegt próf
1 spurning

ég get hreinlega ekki beðið eftir að 4. júní renni upp...

aleinn í heiminum

2007-05-25T17:21:00.000Z

jæja... nú er ég orðinn Palli er einn í heiminum... Óli yfirgaf mig í gær og er með gæsahúð heima á klaka þessa stundina... Það er nú bara gott á hann þar sem hann yfirgaf mig í miðjum prófum. Ég er búin með það sem ég taldi að yrði næst slæmast... og minnst slæmast... en það eina sem eftir er verður slæmast að öllum líkindum. Staflinn sem prófað er upp úr í því tilfelli nær nánast alla leið upp í loft og vekur hroll bara við tilhugsunina eina.

Annars bara lítið að frétta. Var farið að dreyma Navier-Stokes jöfnur á tímabili en er að ná mér ;o) Og svo kem ég heim á klaka 7. júní! Þokkalega

Gamalmenni...

2007-05-18T09:32:00.000Z

Góðan daginn..

Jæja, nú höfum við Eyja loksins fengið það staðfest að við erum orðin gömul!! Komumst að því "the hard way" í gærkvöldi þegar Eyja hamaðist í bókunum og húsfaðirinn lá í sófanum.
Heyrðum þennan brjálaða techno - takt (að okkar mati) sem hófst klukkan 21:00 í gærkvöldi og vorum við alveg sjúr á því að óhljóðin kæmu frá íbúðinni hér að ofan. Lítið við því að gera en að troða eyrnatöppum upp í eyrun (Eyja) og hækka í imbanum (moi).

Þegar klukkan varð svo 12 á miðnætti var okkur hætt að lítast á blikuna. Fór ég þá í rannsóknarferð um stigaganginn og komst þá að því, að óhljóðin komu ekki úr íbúðum í stigaganginum, því þar búa nær eingöngu gamalmenni, og ólíklegt að þau væru að hlusta á "Firestarter" og önnur þvíumlík lög.
Rölti ég þá út á stuttbuxunum og komst að þeirri niðurstöðu að óhljóðin komu ekki einu sinni frá okkar byggingu og ekki blokkunum hér í kring heldur. Um var að ræða einbýlishús sem er töluvert frá okkar íbúð.....

Það var lítið sem við gátum því gert í þessu annað en að reyna að sofna. Lestrarhesturinn Arnhildur Eyja náði varla að snerta koddann áður en hún var komin inn í ævintýralandið en ég hins vegar dillaði mér við "Botan Anna" og önnur stórmeistaraverk eitthvað fram undir morgun.....

Við erum greinilega orðin gömul...ekki nokkur spurning um það. Erum einnig svo góðu vön hér í DK þar sem maður hrekkur upp þegar maður heyrir í stofuklukkunni á efri hæðinni, hvað þá meira...

Hilsen,
Svefn-vana Óli

óóóþolandi

2007-05-14T20:14:00.000Z

Klesstur banani í botninum á skólatöskunni klukkan 7:45 á mánudagsmorgni er ekki til þess að bæta geðheilsuna þegar maður þurfti að vakna 6:50 til að vera mættur á réttum tíma upp í skóla...

Tilraunadýr og hjólatúr

2007-05-12T13:15:00.000Z

Kommensiesæl...

Jæja, þá er komin helgi, enn einu sinni, og það styttist óðum í það að við þurfum að skella okkur á klakann í rigninguna. En það verður bara hressandi. Stefnir í veiðiferðir, grillveislur og almenna gleði í sumar samofið við vinnu. :)

En annars lenti ég í enn einu ævintýrinu um daginn. Og aftur var það fákurinn minn góði sem kom við sögu. Þannig var mál með vexti að ég var á leiðinni heim eftir stórkostlegan leik okkar Ísborgar manna á hjólinu og var leikurinn háður á Kagså kollegíinu sem er í Herlev, hálftíma hjólatúr frá Dalstrikinu. Honum lauk svo um klukkan 18:45 á Balkanvision kvöldinu síðastliðinn fimmtudag og vorum við sköthjú búin að bjóða gestum (snillingunum Rakeli og Hilmari) í mat klukkan 19:00 og átti heimilisfaðirinn að grilla á svölunum.

Eftir að vera búinn að hjóla í svona 2 mínútur heyrast þessir gríðarlegu skruðningar í hjólinu og ég stoppa, kíki á þetta og þar sem ég er ekki mjög vel að mér um keðjur og tannhjól, hélt ég áfram för minni. Þannig að ég hoppa upp á fákinn aftur og hjóla og áður en ég veit af er keðjan slitin. Ekki nema í annað skiptið á mjög stuttum tíma. Og já...ég keypti nýja keðju meira að segja síðast þegar ég sleit keðjuna.

Nú voru góð ráð dýr. Ég hafði 10 mínútur til að komast heim á Dalstrikið og ég staddur við Kagså á tveimur jafnfljótum með ónýtt hjól.

Það er skemmst frá því að segja að 25 mínútum seinna rúllaði ég niður í hjólakjallarann á Dalstrikinu búinn að hlaupa nokkra kílómetra með hjólið í eftirdragi......bölvandi alla leiðina að sjá ekki einn einasta leigubíl sem var laus!!

Nú er næsta plan að heimsækja vini mína á hjólaverkstæðinu og græja nýja keðju.....

Núna í gær gaf ég síðan svita og tár til vísindarannsókna í skólanum hennar Eyju. Ég gaf s.s. kost á mér í viðmiðunarhóp í rannsókn sem fjallar um krossbandaslit íþróttamanna. Viðmiðunarhópurinn samanstóð af miklum íþróttamönnum (s.s. ég.......je ræt) sem aldrei hafa orðið fyrir krossbandaslitum.

Rannsóknin fór þannig fram að skynjarar voru límdir á nokkra staði á hægra lærið á mér og ég látinn lyfta á móti einhverjum róbót sem ég átti að reyna að stöðva með lærvöðvunum, bæði með fremri og aftari lærvöðvunum. Það var s.s. ekki möguleiki að stöðva róbótinn og átti ég að gera mitt besta.

Ég í lyftingunum.....hef aðeins bætt á mig nokkrum kílóum síðan þið sáuð mig síðast!!

Var alveg búinn eftir þetta í öðru lærinu náttúrulega....Eyja þurfti næstum að halda á mér heim.

En annars er seinni hluti Balkanvision í kvöld og danskir vinir okkar á leiðinni í mat. Spurning hvort maður eigi ekki bara að reyna að kjósa Svíana eins og maður getur.....eða bara detta í Austur - Evrópu og kjósa "gelluna" í jakkafötunum....hehe...afskaplega undarlegt að hún komst áfram....

Hér gefur að líta á "skvísuna" í Balkanvisioninu...

Hilsen

ÓliG

Þá er það officielt...

2007-05-10T22:13:00.000Z

ég er búin að missa trúna á Eurovision.

Við sátum 4 í sófanum á Dalstrikinu og kusum Eika Hauks í bak og fyrir og allt kom fyrir ekki. Ekki eitt lag frá vesturhluta álfunnar komst áfram og það sem verra er, lögunum frá austurhlutanum fjölgar bara og fjölgar. En þetta er samt svo fyndin keppni og mikið hlegið í kvöld af hinum ýmsu atriðum, vindvélum og klæðnaði...

ég held við ættum bara að finna okkur eitthvað betra að gera en að taka þátt í Eurovision, við eigum ekki break svona alein langt norður í íshafi ;o)

Annars er kominn háttatími...

Þið segið nokkuð

2007-05-04T21:13:00.000Z

Nei, því miður... okkur hefur ekki tekist að gera neina gloríu síðan á miðvikudaginn, sem er kannski jafn gott þar sem það er bara föstudagskvöld. Annars kom mamma með gott innslag. Hún heldur því fram að gömlu konunni í strætónum hljóti að hafa litist svona vel á Óla og bara helst viljað vera amma hans. Ég held að það sé rétt hjá henni jafnvel þó Óli vilji bara ekki ræða þetta atvik mjög mikið... hehe!!

Fengum annars gest í dag. Það er áfram sumarblíða á Dalstrikinu og galopið út á svalir og í dag ákvað herra geitungur að hér væri fínt að búa. Óli var ekki sérstaklega hrifinn af þessum gesti þar sem hann var að vinna í stofunni og var svona að íhuga hvað hægt væri að gera í málinu. Ég vildi endilega bara hárspreyja geitunginn en það fékk ekki hljómgrunn hjá líffræðingnum á heimilinu og undir lokin þá tókst okkur að koma herra geitungi í skilning um að hann væri ekki velkominn svo hann fór og slapp lifandi úr þessu ævintýri. Hefði ég verið ein heima ætti ég hins vegar uppstoppaðan geitung...

Annars er bara lítið að frétta, ég finn að prófstressið er farið að naga mig í hælana og svo þjáist ég af ofstórtplan-syndromi þessa dagana og kemst aldrei yfir helminginn af því sem ég ætlaði mér. Svo miðað við hvað hárið er búið að ákveða að detta af í stórum skömmtum þá verð ég komin með góðan skalla þegar ég kem næst til Íslands...

Bestu kveðjur frá Köben ;o)

Enn eitt Ikea ævintýrið

2007-05-02T18:11:00.000Z

Jæja.....enn og aftur gerðum við Eyja okkur að fíflum í dag....og núna á leiðinni heim úr Ikea.

Þannig er mál með vexti að Eyja hringdi í mig klukkan 13:00 að staðartíma í dag og spurði hvort ég vildi ekki bara hjóla niður í Ikea (10 mín hjólatúr) og hitta hana þar (hún var s.s. í skólanum) og við myndum fá okkur hádegismat saman (Swedish meatballs.....klikka seint). Ekki var hugmyndin sú að við myndum kaupa eitthvað svakalegt....kíkja bara aðeins og borða svo...kannski fá ís í eftirrétt.
En önnur varð raunin.........

Eftir hálf brösulega ferð niður í Ikea, þar sem Eyja þurfti að koma fyrst heim til að opna hjólageymsluna (hún var s.s. með hjólageymslulykilinn á sér og hjólið mitt þá læst inni) , að þá komumst við loks þangað hálftíma síðar.
Við röltum í hægðum okkar (mjög smekklegt) um búðina sem var nánast fokheld "på grunden af ombygning"...þannig að við skelltum okkur bara beint í sænskar eftir að hafa séð þessa fínu plaststóla sem við ætluðum að versla á svalirnar.
Eftir sænsku bollurnar og pastað og vonda sænska gosið, röltum við í átt að lagernum. Þá sáum við þetta "tilboð sem við gátum ekki hafnað" sem hljóðaði upp á 2 stóla og borð á aðeins 299 dKr, þessi fínustu garðhúsgögn. Við snarhættum við plaststólana og kipptum þessum níðþungu stólum og borði út. Á leiðinni að kassanum sáum við (eða Eyja) einmitt annað tilboð sem var glapræði að hafna...12 risastór glös á verði 6, eða eitthvað slíkt.
Nú jæja...þá drifum við okkur á kassann áður en fleira týndist ofan í körfuna og borguðum.
Við röltum því næst út úr Ikea, södd og sæl, með þessi fínu garðhúsgögn, 12 glös (níðþung svona upp á spaugið) og þessar fínu sessur (beinaberu rassarnir okkar verða að geta setið klukkutímum saman á þessum stólum) og uppgötvum þá okkur til mikillar skelfingar...............Aaaaandddskkotinnnn......við erum á hjólum!!!!
Jæja..við höfum svo sem keypt annað eins og labbað/hjólað heim þannig að við gerðum heiðarlega tilraun til þess að gera það einnig núna. Eftir 5 mín gang með allt draslið vorum við aðeins komin svona 10 metra frá Ikea búðinni.
Þá kemur Eyja með þessa fínu hugmynd um að ég myndi bara skoppa yfir götuna og fara í strætó með garðhúsgögnin, hún myndi læsa hjólinu mínu hjá Ikea og hjóla svo heim á sínu hjóli með glösin og sessurnar. Ég staulast yfir götuna með húsgögnin og strætóinn rennur þá akkúrat að stoppistöðinni. Ég skrölti inn í vagninn, borga og skelli mér svo aftur í vagninn.
Þegar næsta stöð er Vangede station fer ég svona að íhuga það að fara að halda á draslinu til að geta stokkið út....en einhverra hluta vegna var ómögulegt að halda á þessu og ég var náttúrulega við útganginn. Kom þá að mér ein lítil, gömul og krumpuð kona með göngugrind sem býðst til að hjálpa mér.
Ja hérna.....fulltíða maðurinn með 2 garðstóla og lítið borð gat nú ekki beðið eina gamla konu um að hjálpa mér...þannig að ég gríp einhvern veginn um þetta drasl og hoppa út úr strætóinum..og á eftir kemur allir farþegarnir sem voru að bíða eftir því að ég myndi dröslast út........

Mental note: Aldrei aftur á hjóli í Ikea......kaupum aldrei ekki neitt!!

p.s. Garðhúsgögnin eru komin á svalirnar og eru svona ljómandi fín.....var þess virði þó það hafi verið umtalsvert vesen að koma þessu heim...

kv. Óli

Jahérna hér

2007-04-28T20:58:00.000Z

Ég veit ekki alveg hvað hefur gerst... en blogger log inn síðan hjá okkur er orðin dönsk... Gerir manni aðeins hægara um vik í byrjun þar sem maður þarf að hugsa sig um hvað þeir eru eiginlega að meina með þessu...

En hérna í DK gengur lífið sinn rólega vanagang. Við erum þessa dagana að upplifa sól og sumaryl sem við getum samt ekki notið nema að hluta til, alla vegana ég. Það er þess vegna galopið út á svalir upp á hvern einasta dag núna til þess að maður geti alla vegana aðeins fylgst með hvernig það er að vera úti í góða veðrinu.

Svo vorum við á årsfest í DTU í gær. Það var mjög gaman en við verðum samt að vara fólk við því það að dansa Lanchie í fullum sal af Dönum og öðrum rugludöllum er ekkert grín. Við komum heim með svöðu sár, Óli með hælafar niður allan sköflunginn og ég með blóðuga stóru tá og bólginn ökkla. Svo ef þið eruð á leiðinni í svona partý verið þá vel skóuð og með góðar legghlífar ;o)

Bless í bilinu - Eyja

P.s. Núna verða allir að fara í Hagkaup og kaupa boli og peysur hannaðar af Ínu systur... hún nefnilega vann einhverja samkeppni hjá þeim! Til hamingju sæta...

Íslandsför og lestarferðin ógurlega

2007-04-21T10:34:00.000Z

Kommensiesæl...

Langt síðan síðast, ég veit. Margar ástæður fyrir bloggleysi....

Við skötuhjúin skruppum á Frón síðustu helgi en því miður var þetta engin skemmtiför. Hún Amma mín Sigga yfirgaf þennan heim rétt um páskana eftir erfið veikindi og því vorum við í jarðarför. Amma mín var rosalega góð og skemmtileg kona sem dekraði við okkur barnabörnin sem mest hún mátti. Enginn var svikinn af hennar félagsskap og þeir sem þekktu hana höfðu allir það sama að segja um hana; rosalega góð og skemmtileg kona sem var höfðingi heim að sækja og vinur vina sinna. En nú er hún komin til afa Ludwig og Helgu litlu og næsta líf tekur við. Hvíl í friði amma mín.

Þegar við komum síðan heim aftur úr Íslandsförinni tók nístingskuldi á móti okkur (8°C og rigning). Við lendum á Kastrup seint um kvöld (22:00 á staðartíma) og ætlum að drífa okkur sem við getum heim á Dalstroeget. Lestin mætir svo óstundvíslega eins og vanalega akkúrat þegar við erum að skríða niður úr Terminalinu. Eyja ákveður að sjá um að klippa fyrir okkur í lestina á meðan ég átti að passa töskurnar. Auk þess að hafa töskurnar var ég með 2 pylsur í höndunum (Steff Houlberg að sjálfsögðu) sem við splæstum í á flugvellinum því að skraufþurra kjúklingabringan og unaðslega kartöflusalatið voru ekki að gera sig í flugvélinni.
Nú, þegar Eyja gekk í humátt að klippikössunum komst hún að því, henni til mikillar ánægju, að kassarnir voru allir bilaðir sem voru við þennan staur, en útundan sér sá hún aðra 2 kassa í fjarska sem virtust vera í lagi. Hún hleypur í áttina að kössunum og biður mig um að þoka mér í áttina að lestinni, þar sem hún átti að fara eftir 2 mínútur. Ég misskildi hana eitthvað (eða ákvað eitthvað annað en það sem hún sagði mér, eins og gerist stundum) og vippaði mér bara inn í lestina með 2 ferðatöskur, 1 fartölvu, 2 plastpoka og 2 pylsur. Þegar inn var komið heyri ég í fjarska ógnvænlega flautið hjá lestarverðinum um að nú ætli lestin að fara. Nú voru góð ráð dýr! Ég var inni í lestinni, með nánast allan farangurinn en engan farmiða, á meðan Eyja var enn úti að bíða eftir að komast að kassanum. Rek ég höfuðið því leiftursnöggt út úr lestinni og kalla í Eyju. Þá heyri ég bara eitt orð: " ÚT, ÚT" endurtekið nokkrum sinnum. Þannig að ég sný mér aftur að töskunum, sting pylsunum upp í mig og dröslast með allt dótið út. Úfff...þarna rétt slapp ég við að borga 600 dkr í sekt fyrir að vera ekki með farmiða. Nú, því næst skima ég á eftir Eyju og sé hana hvergi á brautarpallinum (NB enn með 2 pylsur í munninum, 2 plastpoka, 2 ferðatöskur og 1 fartölvu)....sé ég hana ekki valhoppa (eða allt að því) inni í lestinni að þeim stað þar sem ég stóð áður með allt draslið, hæstánægð með að hafa náð að klippa. Við skulum allavegana segja sem svo að hún fékk aldeilis mikið fyrir klippið....fékk 2 ferðir til Tårnby í stað einnar. Hún þurfti s.s. að fara þangað og til baka aftur til að sækja mig, þar sem ég var ekki með neina lestarmiða, eða pening eða neitt.
Gæti trúað því að ég hafi litið frekar fíflalega út á brautarpallinum með allt þetta drasl, með pylsurnar upp í munninum og konuna inni í lestinni.

Mental note to yourself: Það kemur (yfirleitt) alltaf önnur lest strax á eftir þessari!!!

Hilsen,
Óli, PTT (útleggst á engilsaxnesku Professional Train Traveler)

Gleðilega páska...

2007-04-06T21:27:00.000Z

já... það er farið að síga á seinnihluta páskafrísins og Fjóla farin frá okkur fyrir löngu. Við erum nú samt búin að hafa það voða fínt og lítið gerst hérna megin við hafið síðan síðustu opinberu heimsókn lauk. Erum bara búin að vera í afslöppun og vídeóglápi sem er sko alveg ágætt svona inn á milli. En í tilefni páskanna ætla ég að setja inn nokkrar myndir frá undanförnum mánuðum í dk.

Fyrsta opinbera heimsóknin var Ínfín og Ranúr... Við vorum ekki mikið að taka myndir á okkar myndavél og finnst mér leiðinlegast að pokadýramyndin af strákunum var á vél þeirra skötuhjúa...
En hér er augljóslega verið að slaka á eftir erfiðan dag í búðunum... það tekur á að shop till you drop sko....

Næst á dagskrá voru svo Sigga og Maggi... þau voru ekki alveg jafn góð í búðunum og Ína, enda er erfitt að slá henni við!!

Hér erum við úti að borða og ég veit ekki hvað er á kinninni á Magnúsi en það lítur út fyrir að vera gott á bragðið... hehe

Eftir að Sigga og Maggi fóru heim komu Elísabet og Helga í dömuferð til okkar. Með þeim var farið oft út að borða og mmm það var sko gott.

Hér erum við stödd á Italiano og þjónninn loksins þagnaður. Það er með ólíkindum hvað þeir halda að þeir syngi vel þarna... Þær mæðgur fóru nú líka svei mér þá fram úr Siggu og Magga hvað verslun varðar en Ína trónir enn á toppnum og efast ég um að nokkur slái hana út... hehe

Þegar nær dró páskum millilenti Myriam hjá okkur. Það var alveg hreint magnað að fá hana og ég tala nú ekki um páskaeggið sem hún skildi eftir hjá okkur...

Við fórum eina ferð út að borða og er það með skondnari útaðborða ferðum sem við höfum farið. Löngu söguna af þessari ferð getið fengið þegar þið hittið okkur næst!!

Svo var sko komið páskafrí og vor í Kaupmannahöfn. Af því tilefni komu bæði Ása tása og Fjóla spóla við hjá okkur hjúunum. Veðrið var svooo gott að við fórum í túristalabb sem gerði nánast út af við Ólaf, held hann eigi seint eftir að ná sér.

Hér er verið að kíkja á dönsku hermennina í ratleik í Kastellienu.

Svo er Fjóla að sjálfsögðu alveg einstök og hún flutti heim til Íslands eins og eina gæludýrabúð.

Þetta appelsínugula er eitt af því sem Snotra eignaðist þegar Fjóla kom heim og við erum búin að fá að heyra að apinn vakti mikla lukku! Svo var ekki verra að það urðu eftir tvö páskaegg í viðbót hjá okkur þegar Fjóla var búin að koma í heimsókn...

Síðasta daginn með Fjólu var farið á Bakken og haldiði að Ólafur hafi ekki brett upp ermarnar og unnið handa mér risa bangsa! Mín varð ekki lítið ánægð ;o)

Þetta er sem sagt selurinn sem Óli veiddi og erum við enn að ræða það hvort hann á að heita Snorri eða Snati. Mér heyrist samt að Snati sé að festast við hann.

Svo við höfum sko haft í nógu að snúast síðan við vorum á Íslandi síðast...

Næst á dagskrá er svo bara að sjá hvort okkur tekst að búa til mat úr lambalærinu sem Helga og Elísabet færðu okkur til að borða um páskana... hvernig það fer heyriði kannski um síðar! Vonandi eru sem flestir hressir og kátir í kuldanum á Íslandi...

Gleðilega páska

Óli og Eyja

P.s. Ína og Rúnar... við rákumst á maríuhænuna í bænum... Hún bað kærlega að heilsa ;o)

Alltaf að læra eikka nýtt...

2007-03-29T15:39:00.000Z

Í dag lærði ég til dæmis að eitt af fáu sem teljast þess virði að skrópa í skóla fyrir er bein útsendin frá HM í sundi þar sem kynnarnir eru þýskir...
Í dag lærði ég líka að rautt greip er agalega súrt...
Annars er Fjóla væntanleg eftir 4 tíma og bakarinn kominn í gírinn í eldhúsinu... jei

Forår

2007-03-26T11:02:00.000Z

Ég held svei mér þá að það sé komið vor í DK. Það er alla vegana sól og blíða hjá okkur þessa dagana og við Óli njótum þess í botn. Fórum til dæmis í óvissuhjólatúr í gær og enduðum í ísbúð hérna rétt hjá sem selur ítalskan kúlu ís. Það var næs...
Annars bara tiltöluleg rólegheit í ganginum. Myriam stoppaði hjá okkur á leiðinni til Sviss í páskafrí í síðustu viku en Óli segir að það hafi bara verið millilending og teljist þess vegna ekki til opinberrar heimsóknar! Svo styttist í páskafrí og þá æglum við að hafa tærnar uppi í loft meira eða minna bara.
Svo bíðum við skötuhjúin bara spennt eftir næstu heimsókn sem hefst með viðhöfn á fim.kvöld. Það verður sko pottþétt brallað eikka sniðugt með Fjólu og Ásu báðar í takinu!

Annars langaði mig að setja upp smá getraun... Hvað er litli fíllinn að borða á myndinni í síðustu færslu?? Helga... þú mátt ekki svara!! Það eru vegleg verðlaun í boði fyrir rétt svar ;o)

Undanfarnar 2 vikur.....og 4. opinbera heimsóknin!

2007-03-24T17:02:00.000Z

Kommensiesæl,

Jæja, 3. opinberu heimsókninni lauk um þar síðustu helgi, en vegna mikilla anna (eða þannig) blogga ég ekki fyrr en nú. Þar sem ég var víst búinn að lofa upp í ermina á mér einhverjum myndum og var ekki að fixa þær fyrr en núna rétt í þessu, kemur hér örstutt blogg.

Móðir mín og litla systir voru hér í viku í þvílíku blíðviðri, 15 stiga hiti og sól næstum upp á hvern einasta dag. Á meðan mamma var á hressandi ráðstefnu í Gautaborg, fórum við Helga og spígsporuðum í gegnum Dýragarðinn...hef alltaf jafn gaman að fara þangað. Eyja komst því miður ekki með, þar sem hún var föst í skólanum.

Einnig var að sjálfsögðu verslað (þ.e.a.s. mamma og Helga)....við Eyja alltaf svo stillt í þeim efnum.

Hér koma nokkrar myndir, nánast allar úr Dýragarðinum:

Takk kærlega fyrir komuna mamma og Helga....verið bara velkomnar aftur í heimsókn. :)

Annars er það að frétta að 4. opinbera heimsóknin verður næstu helgi. Þá ætlar ungfrú Fjóla að bregða undir sér betri fætinum, stökkva upp í flugvél og kíkja á okkur skötuhjúin hér í Baunalandi. Stefnt er á verslunar-/rólegheitar-/dýragarðar- og áthelgi sem svíkur engan...vonandi. Einnig ætlar Dr. Ása Tása að stoppa hjá okkur í 2 daga áður en hún heldur heim á leið í kærkomið páskafrí, væntanlega kærkomið frí frá bókunum. Það verður því tvöföld ánægja næstu helgi....

Og síðan að lokum er það orðið opinbert að ég er farinn að mæta á fótboltaæfingar 2var í viku í Buddinge skole, sem er hérna rétt hjá okkur. Er ég þar að spila knattspyrnu með nokkrum fílefldum íslenskum karlmönnum sem eru flestir, að minni bestu vitund, búsettir á einhverju kollegíinu. Tilheyra þeir stórliðinu Boldklubben Ísborg sem ég er víst orðinn hluti af. Mjög skemmtilegt að hreyfa sig svona aðeins, svo maður verður ekki hnöttóttur þegar maður mætir á Frónið.

Jæja, allt of langt blogg...trúi ekki að nokkur nenni að lesa þetta..

Hilsen

I'm still alive

2007-03-20T21:25:00.000Z

en samt bara barely...
Lifði samt munnlega prófið af og náði því þar að auki svo þetta er allt í áttina.
Svo á ég líka svo góðan mann, hann bauð mér á PizzaHut í kvöld í tilefni dagsins. Svo ætlar þessi elska að hrista eina köku fram úr erminni á morgun þar sem ég á víst að koma með köku í biomekanik á fim auk þess að vera með fyrirlestur. Ég er einu sinni búin að fara með köku sem Óli bakaði í tíma og hún var svo góð að fólk bíður spennt eftir þessari sem borða á á fim... Jói Fel hvað....
Annars er bara síþreyta í ganginum og mín því farin í bælið...
P.s. Ína, ég skal sko ekki liggja á liði mínu í skipulagningu og mátulegri pressu varðandi fjöldaferðarheimsóknina!!

Læri, læri, tækifæri...

2007-03-16T22:02:00.000Z

Þá er þriðju opinberu heimsókninni lokið og ég held jafnvel að þær mæðgur Helga og Elísabet hafi tekið um það bil hálfa Kaupmannahöfn með sér yfir hafið.
Ég er einu sinni enn sokkin upp fyrir haus í lærdómi... lokapróf í statistik á þriðjudaginn kl. 16:00 svo þið eruð vinsamlegast beðin að senda góða strauma kl. 15:00 á íslenskum tíma. Það veitir nefnilega ekki af þar sem prófið er munnlegt og þar að auki á dönsku...
Svo er fyrirlestur i biomekanik á fim svo ég á ekki eftir að anda fyrr en í kringum páskafrí...
Óli er í góðu geymi eins og alltaf... hann lætur líklega heyra frá sér fljótlega og þá koma jafnvel inn myndir úr heimsókn 2 í dýragarðinn... Adios!

3. opinbera heimsóknin

2007-03-08T21:23:00.000Z

Kommensiesæl

Já, þá styttist í 3. opinberu heimsóknina hingað til Kóngsins Köben. Móðir mín og litla systir hún Helga ætla að koma hingað á laugardaginn og vera hér í viku. Mamma að fara á ráðstefnu í Gautaborg og á meðan ætlum við Helga að dútla eitthvað....fara í Dýragarðinn og svona eitthvað skemmtilegt. Gríðarlegt fjör.

Annars er það að frétta að við Eyja erum búin að vera í svolitlu stríði við hjólin okkar ástkæru. Núna síðast komst ég að því að afturdekkið á hjólinu er kapútt....Indverjinn vinur minn sem á hjólaverkstæðið hér á Söborg Hovedgade úrskurðaði það látið í dag. Þannig að nýtt dekk og ný slanga verður sett á hjólið og allt klárt eftir 11 í fyrramálið. Þeir eru nú ekki lengi að þessu.

Síðan er ég búinn að taka ákvörðun um að reyna að fara í einhverja kúrsa í DTU næsta haust og vor. Gríðarlega spennandi. Ég ætla að hætta mér á Nemendaskrifstofuna í DTU á morgun og ræða þar við konurnar. Eins og þeir vita sem gengið hafa í Háskóla Íslands, að þá eru konurnar á nemendaskráningunni þar á bæ ekki með hressasta móti. Það að biðja um ljósrit af einhverju var eins og að draga úr þeim tennurnar! Gæti verið að þær hafi eitthvað breyst....jú ár og dagar síðan maður útskrifaðist.
Konurnar í DTU er víst í sama fari og þær íslensku; gríðarlega óþolinmóðar. En maður verður bara að reyna að vinna þær á sitt band og þá fer allt vel.
Þeir kúrsar sem ég hef ákveðið að reyna að taka, fyrir áhugasama, eru eftirfarandi:
Pharmaceautical Technology
GXP - Good Industrial Practices
Management and Organization
Strategy and Planning Methods

Allt gríðarlega hagnýtt og spennandi.
Nú er bara að vona að þetta verði ekkert mál og ég verði bara boðinn velkominn í DTU á morgun.

Jæja, meira blogg og myndir á næstu dögum.

Hilsen.

Stríðsástand

2007-03-05T20:47:00.000Z

... í gamla hverfinu mínu. Það eru sko nokkuð margir sem eru að hrósa happi yfir því þessa dagana að ég sé flutt úr gettóinu og ég er nú bara nokkuð ánægð með það líka. Það er búið að brenna held ég bara nánast allt sem hægt er að brenna niður á Nörrebrogade og samt er allt í háalofti þar enn. Og ekki nóg með að lögreglumenn úr öllum umdæmum Danmerkur séu staddir á Nörrebrogade þessa stundina heldur er búið að kalla til liðsauka frá Svíþjóð. Segið svo að ekkert gerist í Köben...
Við vorum annars í afmæli niður á Nörrebro á laugardagskvöldið og upp úr miðnætti heyrist í einum stráknum: nu er der krig på Nörrebrogade... þetta voru sem sagt nýjustu upplýsingar frá vini hans sem bjó við þessa mjög svo umtöluðu götu... Ein vinkona mín úr skólanum sem var í afmælinu þurfti að krossa götuna ógurlegu til að komast heim og hún kíkti vandlega fyrir öll horn áður en hún þorði yfir. Og lögregluhópurinn var ekki í nema svona 30 m fjarlægð frá henni en óróaseggirnir voru svo hinum megin við löggurnar svo hún komst heilu og höldnu heim... Við Óli fórum hins vegar bara í hina áttina og urðum ekki vör við neitt frekar en fyrri daginn.
Í dag var síðan skóli niður á Nörrebro og það sem ég tók helst eftir er að ÖLL strætóskýli í hverfinu, eða alla vegana öll sem ég hjólaði framhjá og þau eru nokkur, þau eru í þúsund molum minnst. Svo það verður nóg að gera hjá sópurunum þegar/ef ró kemst á svæðið...
Af öðrum málum er hins vegar bara lítið og gott að frétta. Ólinn er samt búinn að vera veikur í dag sem er ómögulegt. Vonandi fer það að batna þar sem við fáum eina heimsókn í viðbót um helgina. Þá ætla nefnilega Elísabet og Helga að heiðra okkur með nærveru sinni og eins gott að bakarinn á heimilinu verði orðinn hress!! Hjá mér er nóg að gera. Á til dæmis eftir góðan bunka af blaðsíðum fyrir morgundaginn plús það að próf og skil á verklegu nálgast óðum... ætti kannski frekar að snúa mér að náminu en að hanga í símanum og blogga eitthvað bull... Heyrumst síðar þegar ég verð farin að ná andanum ;o)

Myndir síðustu daga

2007-03-03T18:03:00.000Z

Kommensiesæl

Ég var víst búinn að lofa nokkrum myndum inn á síðuna um daginn...maður neyðist til að standa við það:

Magnús eldheitur í leðurbuxum

Fíllinn glaði í dýragarðinum

Alveg salí rólegur....

Að gæða sér á hestinum góða...

Wannabe tígrisdýr, sem var laust í dýragarðinum.. hehe

Á svamli..

Eyja, Sigga og Gulltyppið...

Skoðanakönnun: Á Maggi að fá sér leðurbuxur?

kv. Heimilsfaðirinn

Snestorm og heimsókn

2007-02-28T14:49:00.000Z

Kommensiesæl

Síðasta vika hér í DK einkenndist af "brjáluðum" snjóstormi sem setti allt á annan endann hér í Köben. Strætisvagnar og lestar hættu að ganga, skólar og vinnustaðir voru lokaðir og út um allt voru spólandi bílar á sínum fínu sumardekkjum. Okkur Eyju fannst þetta frekar skondið þar sem ekki var um mikinn snjó að ræða, að minnsta kosti ef borið er saman vetraríkið í norðri (lesist Húsavík). Krakkarnir í köben voru svona líka ánægðir með snjóinn að heilu leikskólarnir voru saman komnir í "brekkunni" fyrir utan húsið okkar og skemmtu sér konunglega með sleðana sína, nánast á jafnsléttu.
Það versta í þessu veðri var samt sem áður það að einn daginn vöknuðum við Eyja við það að ekkert netsamband náðist héðan af Dalstrikinu, sérstaklega slæmt þar sem húsfaðirinn brúkar netið í vinnunni. Eyja hringdi þá strax um morguninn og fékk símsvara: "På grunden af snevejret opner vi klokken 10. Ring venligst efter 10". Alveg svakalegt. Þá var víst lítið annað að gera en að bíða þar til klukkan slóg 10 og hringja aftur þá.
Eyja hringir svo klukkan 10 og er þá númer 50 í röðinni. Greinilega fleiri frekar pirraðir á þessu, sérstaklega þar sem sjónvarpið datt út líka. Þegar greyið Eyja fær svo loksins samband við þjónustufulltrúann fær hún þau svör að raki hafi komist inn á sendistöð TDC í hverfinu og viðgerðarmennirnir eru veðurtepptir, þannig að þau geta lítið annað gert en að bíða. Alveg sérstaklega kómískt sérstaklega þar sem einungis var um nokkurra sentimetra jafnfallinn snjó að ræða.
Þetta reddaðist að sjálfsögðu á endanum....þegar sólin skein og þurrkaði sendistöðina.

Annars var innrás frá Fróni um helgina....ungfrú Sigríður og ungherra Magnús voru í besög. Planið var að fara til Malmö á laugardeginum og í Zoologiskehave á sunnudeginum en vegna snjóstormsins var ákveðið að hætta við þau plön, þó svo að ég hefði nú alveg verið til í að vera veðurtepptur í dýragarðinum. :)
Áttum annars notalega helgi og brölluðum ýmislegt, borðuðum góðan mat og drukkum gott vín (við Maggi þá). Það voru engu að síður tvær setningar sem lifa í fersku minni eftir helgina:

"Sniðið var ekki alveg að passa, og svo voru þær líka fóðraðar" - Maggi eftir að hafa skellt sér í leðurbuxur í Fisketorvet.

"Jiiii, hihiihihhihhihihi" - Sigga og "Þetta hlýtur að vera bannað innan 18, trúi ekki að þau hleypi unglingum inn á þetta" - Eyja inni á Museum Erotica.

Myndir á næsta leyti...skelli inn vel völdum myndum úr Dýragarðinum og hugsanlega einhverju meira á næstunni.....

Hilsen,
Óli

Kengúrur og önnur pokadýr

2007-02-19T11:50:00.000Z

Viðburðarík helgi að baki hér í Danaveldi. Frú Ína og Herra Rúnar eru nú í stálfuglinum á heimleið eftir "shop-'till-you-drop" helgi þar sem H&M var misnotuð ásamt fleiri sérvöldum búðum. Við Rúnar erum núna þekktir í Köben sem "pokadýrin" þar sem það sást iðulega til okkar (en þó ekki í okkur) með mannhæðaháa pokastæðu, yfirleitt dauðuppgefnir á bekk á meðan stúlkurnar þeystust á milli búða.

Við gerðum nú samt ýmislegt annað en að versla, fórum til að mynda í Zoologiske Have í gær og þar rættist gamall draumur minn, því undirritaður er núna stoltur eigandi á árskorti í dýragarðinn. Þarna umbreytast hörðustu menn í lítil börn við það eitt að sjá öll þessi skemmtilegu dýr leika sér. Myndavélin fékk líka að finna fyrir því þann daginn þar sem skotið var stíft á saklausu dýrin. Myndir koma kannski síðar ef litla sys man eftir að kippa með sér Photoshop ;)

Annars horfðum við ekki bara á saklausu dýrin...við gúffuðum þau líka í okkur. Á laugardeginum átti Herra Rúnar afmæli og fékk hann að velja hvað yrði borðað um kvöldið. Hann stakk upp á staðnum Reef And Beef við Ráðhústorgið, ástralskur veitingastaður með ýmsa skringilega og skemmtilega rétti. Við pöntuðum okkur öll svona tilboðsmatseðla sem samanstóð af kengúrum, krókódíl og örlítið minna exótískum mat; reyktum laxi. Bragðaðist þetta allt saman ótrúlega vel og kengúran var hrikalega meyr og góð. Krókódíllinn kom einnig mjög á óvart...svipar svolítið til vel kryddaðs kjúklings.

Skemmtileg helgi að baki og nú hefst alvaran, vinna fyrir mig og læra fyrir Eyju. Eigum þó von á góðum gestum strax á fimmtudaginn þegar Sigga litla systir mín mætir á svæðið og með hálfatvinnumanninn Magnús Inga upp á arminn. Planið verður útbúið síðar.

Hilsen,

Óli

Nýjasta nýtt í búðum í DK

2007-02-15T15:11:00.000Z

Undanfarna daga hafa starfsmenn stórverslunarinnar Orion í verslunarmiðstöðinni Fields ekki haft undan við að afgreiða miðaldra og íturvaxna karlmenn. Þeir eru allir komnir til þess að versla sér nýjustu afurð Orion, karlmannsbrjóstarhaldarann (eða Herre BH). Sjá mynd hér að neðan:

Mynd: Hér má sjá fyrirsætuna Casper pósa með græjuna.

Með tilkomu þessara sílíkonhaldara eru öll saggy men's breast úr sögunni og allir miðaldra danskir karlmenn ganga sperrtir og stoltir um götur borgarinnar. Nú geta þeir hætt að styrkja líkamsræktarstöðvar með mánaðarlegum afborgunum og keypt sér þess í stað þessa bráðsniðugu nýjung fyrir aðeins 999 Dkr. Spurning hvenær þessi nýjung tröllríður Fróni?

Til allrar hamingju er ég ekki orðinn miðaldra....og ekki kominn með saggy men's breast....ennþá.

Hilsen,

Óli

Fyrsti í heimsókn

2007-02-14T22:32:00.000Z

Herra Rúnar og Frú Ína.

Á morgun, stundvíslega klukkan 19:40, mæta þessi tvö hér að ofan á Kastrup Lufthavn...framundan er mikið verslunarmaraþon með samblandi af át - og drykkjarveislu. Planið er að bæta á sig 5 kg þessa helgina.....gott plan?
Herra Rúnar á afmæli á laugardaginn og verður hann 26 vetra. Að sjálfsögðu verður haldið upp á það með pompi og prakt með svakalegum tilþrifum í eldhúsinu á Dalstrikinu.

Annars var annar í súkkulaðiköku í dag.....enn og aftur bakaði ég Súkkulaðiköku sætabrauðsdrengsins hans Donna.....alveg óstjórnlega góð kaka. Maður verður nú að reyna að vera myndarlegur gestgjafi og bjóða upp á eina brúna þegar fólk kemur í besøg til Kóngsins.

Anyone fanzy a cake? Þá verðið þið bara að gjöra svo vel og mæta í heimsókn.. :) Tekið er við pöntunum í síma 555 - C A K E...

Hilsen,
Óli

Eyja og Óli... á hjóli!

2007-02-08T22:17:00.000Z

Í upphafi dvalar okkar í Danaveldi fjárfestum við skötuhjúin okkur í hjólum til þess að vera nú eins og hinir Danirnir. Og þó við séum ekki búin að vera hérna lengi þá erum við samt búin að lenda í hremmingum á hjólunum...
Fyrir viku síðan vaknaði ég kl. 6:50 til þess að vera nú mætt í skólann kl. 8:00 á föstudagsmorgni. Þetta gekk vonum framar og var ég ein af 3 sem mættu á réttum tíma í tímann. En hins vegar þegar líða tók á föstudaginn umrædda fór að þykkna upp og um klukkutíma áður en ég var búin í skólanum var farið að rigna og það ekkert smááá... Held að eldur og brennisteinn sé nokkuð góð lýsing... Hjólatúrinn heim úr skólanum var sá blautasti sem ég hef upplifað. Var í frekar þykkri úlpu en var blaut inn að brjóstahaldara og gat undið sokkabuxurnar, sem og annað sem ég var í, þegar ég kom heim... Þetta var ekki neitt sérstaklega spes skal ég segja ykkur...
Svo í gær ákváðum við skötuhjúin að fara í smá hjólatúr og ætlaði ég að sýna Óla leiðina sem ég fer upp í DTU og hann getur notað til að fara í Actavis. (Óli á það nefnilega til að vilja beygja í öfuga átt við mig... og ég hef ALLTAF vinninginn í valinu á réttri leið!!) Þegar við vorum að verða hálfnuð upp í DTU ákveður Óli að setja í fluggírinn en það vill ekki betur en svo að kraftarnir voru svo miklir að keðjan á hjólinu slitnaði. Þetta þýddi því 50 mín. gangur til baka í áttina heim og að eina hjólaverkstæðinu sem við fundum og var opið... En nú er búið að lækna hjólið og Óli hjólar eins og vindurinn um götur Kaupmannahafnar ;o)
Á morgun er svo aftur kominn föstudagur og það er spáð ROKI með stórum stöfum í Danmörku... verður áhugavert að sjá hvernig hjólatúrinn í DTU kemur til með að ganga...

(J)Óli Fel

2007-02-06T22:06:00.000Z

Jáa...núna er arftakinn fyrir Jóa Fel fundinn!!! Haldið ykkur fast.....

Núna, þar sem heimilisfaðirinn er 50 % heimavinnandi hér í Köben, hef ég ákveðið að skella mér í eldamennsku/bakstur, svona svo maður geti gert eitthvað annað en að sprengja pulsur í pottinum eða mauksjóða hrísgrjónin. Er ég búinn að prófa nokkra rétti á mér og Eyju og erum við það minnsta enn á lífi, sem er alltaf skemmtilegra. Ætla ég ekki að uppljóstra um hvaða rétti er að ræða, en þetta eru ekki 1944 réttir eða eitthvað þvíumlíkt...um er að ræða alvöru heimilismat.
Á ferðum mínum um uppskriftarsíður á netinu hef ég helst rekist á uppskriftir sem innihalda alls kyns furðuleg innihaldsefni eins og t.d. sítrónugras, skalottulauk, sanostur og guð má vita hvað, allt væntanlega eitthvað sem höfundar uppskriftanna hafa smellt inn til að gera þetta meira "fanzý". Gangi mér vel að fara í búðina, með mína menntaskóladönsku, og biðja um sítrónugras...já, eða skalottulauk: "Jeg vil gerne ha lemon gras, har du sådan noget"? Nei...held ekki...!
Það sem ég hef því gert í staðinn er að finna eitthvað sem hljómar líkt og það sem er í "fanzý" uppskriftunum og gerir ábyggilega sama gagn. Setti t.d. rauðlauk í stað skalottulauk og mozzarella ost í stað sanosts. Og það hefur bara gengið svona nokkuð upp....allavegana erum við Eyja ekki enn dauð, eins og áður sagði.

En nóg um uppskriftir og hráefni...þá erum við búin að koma okkur fyrir hér á Dalstriki 107 í Köben...íbúðin afskaplega notaleg og fín, þrátt fyrir töluvert hærri skítastaðla hér í Köben en eru á Fróni....maður verður að læra að aðlaga sig að nýjum hefðum, ekki satt?
Í næstu viku fáum við fyrstu heimsókn af líklega mörgum þennan tíma sem við ætlum að vera hérna. Þá ætla Ína "shoppaholic" og Rúnar að draga okkur í bæinn og gæti ég trúað að við Rúnar fáum ekki mikla hvíld út úr þessu, berandi alla poka og kassa sem frú Borghildur kaupir. En ef maður lítur á björtu hliðina, verð ég kannski jafn massaður og Jói Fel og get farið að kaupa mér stutta, hvíta og þrönga stuttermaboli og smella mynd af sjálfum mér framan á sinnepssósur og skinkusalöt.

Over & Out,

DK

2007-01-29T22:00:00.000Z

jæja... ætli það sé ekki kominn tími á smá updeit. Við Ólafur erum sem sagt sest að í Danmörku í bili. Höfum ekki yfir miklu að kvarta enn sem komið er, erum í fínni íbúð á fínum stað og líður bara vel. Dótið kemur svo að öllum líkindum á morgun á milli 14 og 17. Þeir eru alveg ágætir Danirnir... láta mann þurfa að sitja heima allan daginn og bíða eftir þessu. Ikea-sendigaurarnir gerðu þetta líka. Þeir hins vegar sögðust koma milli 14 og 18!! Við fórum nefnilega í rosalega Ikea ferð á laugardaginn og keyptum svefnsófa. Eftir miklar mælingar komumst við að þeirri niðurstöðu að við gætum keypt draumasvefnsófann minn. Það leit nefnilega alveg út fyrir það á tímabili að við kæmum honum ekki inn um dyrnar... Vandamálið sem eftir stóð var þá bara að hann er einungis 100 kg og það var ekki auðvelt að halda á honum upp. Og Ikea-sendigaurinn hjálpaði okkur samt... En það hafðist og nokkuð ljóst þykir að kalla verður út mikinn liðsauka þegar flytja á þennan sófa í burtu!!
Annars byrjaði Óli að vinna í dag og fyrsti skóladagurinn hjá mér er á morgun auk þess sem Ísland er að fara að keppa við Danmörku á HM. Æsispennandi dagur framundan...

2007-01-16T23:37:00.000Z

Þeir sem þekkja mig vita að mér er svo sem ekkert sérstaklega vel við sprautur... það hefur ekkert að segja að hafa alist upp hjá meinatækni/lífeindafræðingi maður getur samt haft andúð á sprautum... Alla vegana. Fyrir nokkru síðan áttaði ég mig á því að slatti af öllum þessum sprautum sem sí og æ var sprautað í mann á yngri árum eru nú þegar eða mjög fljótlega að renna út. Ég pantaði þess vegna tíma til að láta nú updeita dótið áður en haldið verður í víking til DK. Mín mætti þess vegna "hress og kát" í sprautu eftir vinnu í dag. Eftir smá samningaviðræður við lækninn samþykkti hann að updeita stífkrampann og mænuveikina með því skilyrði að hann fengi líka að gefa mér eitt búst við lifrarbólgu A. Þegar gaurinn síðan snýr sér við til að finna bóluefnin hvað haldiði að mín uppgötvi sér til smávegis skelfingar??!!! Ég fékk þennan líka forláta langerma rúllukragabol í ammæligjöf frá systkinum mínum í gær og í honum var ég... að sjálfsögðu. Eftir misheppnaða tilraun til að tosa aðra ermina upp fyrir öxl spyr ég lækninn hvora öxlina hann vilji og jaxlinn segir báðar! Ég neyðist því til að vippa mér úr bolnum... þetta fannst mér alveg típísk ég... Ég sem alltaf er í stuttermabolum og hlýrabolum þar fyrir innan og ég veit ekki hvað og hvað stóð þarna með ístruna út í loftið og þakkaði guði fyrir að vera í svona frekar efnismiklum brjóstahaldara...

Annars eru helstu fréttir þær að dótið er farið á Samskip, björgunarsveitin er haldin heim á leið og vika í DK!!!

OMG

2007-01-07T00:06:00.000Z

Það er komið nýtt ár sem þýðir að ég þarf að fara að pakka niður... og það finnst mér ekki hressandi! AAAAAAAAAAAAAargg

Annars erum við Óli loksins búin að ganga frá miða út, förum sem sagt af landi brott óguðlega snemma 23. janúar næstkomandi. "Búslóðin" þarf að fara í skip 16. jan. og er þess vegna búið að panta björgunarsveit að norðan sem mun mæta ásamt föruneyti næstkomandi fimmtudag til að bjarga því sem bjargað verður. Þökkum guði fyrir það ;o)

Annars tókum við gott djamm í gær með Kristínu og Ásu tásu. Erum enn að reyna að ná okkur eftir þann pakka... Kemur líklega til með að taka tíma þar sem mín er algjörlega dottin úr allri æfingu!!

Jólahvað??

2006-12-22T17:36:00.000Z

hæbb...
Ég er komin heim í heiðardalinn og ætla að vera hérna fram yfir áramót. Er ekkert smá ánægð jafnvel þó að Óli sé hinum megin á landinu. Væri samt auðvitað ánægðari ef hann væri líka hér sko... en þetta er fínt. Við Gunnar ákváðum að dissa flugfélagið og fórum bara keyrandi. Það er allt í kaos í innanlandsfluginu út af veðrinu sem búið er að vera í gangi undanfarna daga og maður tekur ekki þann séns að verða veðurteftur á höfuðborgarsvæðinu yfir jólin...
Annars tókum við Óli jólin með trompi þetta árið. Keyptum allar jólagjafir fyrir síðustu helgi nánast, komum jólakortunum í póst á réttum tíma og ég veit ekki hvað og hvað. Held samt að eina ástæðan fyrir þessu sé að við drifum þetta af áður en ég fór í endajaxlaaðgerðina umtöluðu... Jább er orðin tveimur tönnum og nokkrum tugum þúsunda fátækari...
Annars bara allt í gúddí... er haggi?

2006-12-10T00:09:00.000Z

Það hefur sko ýmislegt á daga okkar Óla drifið síðan við fórum og kíktum á bond... Við fórum til dæmis á Rockstar tónleika í Laugardalshöllinni og skemmtum okkur alveg frábærlega. Það var rosa gaman að sjá þetta lið svona up close and personal eftir að hafa fylgst með þeim nokkuð vel í sjónvarpinu í nokkra mánuði. Við vorum nefnilega svo heppin að Sigurveig og Hilmar áttu fjóra miða og buðu okkur að koma með... við erum ekkert smá ánægð með það.

Svo fór ég að sjá The Holiday í bíó. Óli vildi ekki koma með í það skiptið... wonder why!! Þetta var alveg frábær svona rómantísk gamanmynd sem þú verður að sjá Fjóla, það er sko ekki spurning!! Svo skemmir náttúrulega ekki fyrir myndinni hvað Jude Law er sætur!!

Alla vegana... svo erum við komin með íbúð í Kaupmannahöfn sem er náttúrulega bara alveg æði!! Hún er samt aðeins í dýrari kantinum en er bara á svo frábærum stað að við gátum ekki sagt nei. Líka erfitt að segja nei þegar okkur hafði einfaldlega ekki boðist neitt annað!! Annars er bara að hellast yfir mann jólaskap og við búin að vera busy í að kaupa jólagjafir... And that's about it... í bili alla vegana!

007

2006-11-28T23:36:00.000Z

Það var fjölskylduferð í bíó í gærkvöldi á nýjustu myndina með James Bond. Og ég get nú ekki sagt annað en úlala. Var eins og svo margir aðrir í smávegis vafa þegar ég heyrði að Daniel Craig ætti að taka við sem 007 en er ekki það much of a fan að mér var meira bara sama. Ljóshærður Bond var svo sem allt í læ fyrir mig!! Og eins og svo margir aðrir þá verð ég að segja að þetta val á nýjum Bond hefði ekki getað orðið mikið betra. Vááá maðurinn er svo ironic og svoooo sexy og með svoooooo blá augu að ég á ekki til orð. Þetta er sá svalasti sem ég hef séð í Bondbransanum... úúúfffffff. Þar fyrir utan er þetta alveg ágætis skemmtun og vel gerð mynd með ekkert of mikið að of tæknilegum og ótrúlegum brellum og alveg fullt af flottum bílum. Og ég tek venjulega ekki eftir bílum! Mæli með þessu fyrir þá sem mega sjá af einum níuhundruð kalli og þremur tímum... hiklaust ;o)

Allt í blóma...

2006-11-21T21:35:00.000Z

hérna megin... já eða svona næstum. Þvottavélin var úrskurðuð mjög biluð og kostar 25 - 30 þús að gera við hana. Svo nú erum við Óli að bíða eftir kraftaverki og að hún læknist af sjálfu sér. Ekki ætla ég að kaupa nýja þvottavél 2 mánuðum áður en ég flyt á milli landa. Talandi um að flytja á milli landa. Ef það er einhver sem lumar á eins og einni íbúð til leigu í Kaupmannahöfn þá er ég að leita að svoleiðis... allar líkur eru hins vegar á allsherjar heimilisleysi hinum megin við hafið eins og staðan er í dag...
Svo eru hverfandi líkur á að ég fitni um jólin. "Góðu" fréttirnar eru nefnilega þær að ég fer í endajaxlaaðgerð 15. des... og saumarnir teknir 21. des... Ekki sniðugt en nauðsyn... og alveg ómögulegt í alla staði. En svona er lífið...

Seint blogga sumir...

2006-11-10T00:11:00.000Z

...en blogga þó!

Ég er sumsé á lífi þrátt fyrir afleita bloggframmistöðu undanfarna mánuði.
Eyja hefur haldið báðum lesendunum við efnið í fjarveru minni og því vitið þið væntanlega hvað hefur á daga mína drifið.
Nú þegar við skötuhjú erum að leggja land undir fót eftir áramót stefni ég ótrauður að vera duglegri að blogga...stefni því a.m.k. á 2 pósta á ári!! Gott markmið það..

Læt fylgja með nokkrar myndir af okkur félögunum þegar við hittumst á Tálknmunnakvöldinu góða í mínum húsum. Njótið vel....

Siggeir sýndi okkur augun...

á meðan Yanni lét þau hverfa

I'm in a nutshell, I'm in a nutshell!

Gunni mátaði spandex peysuna, Valla til mikillar ánægju!

Stoltur eigandi Spandex peysunnar....takið vel eftir þrýstnum líkamanum!

Jæja..fleira var það ekki...

Og svo kommenta...

hallóóó

2006-11-09T23:57:00.000Z

hér er ekki mikið að frétta frekar en venjulega. Óvissuferðin með stelpunum var mjög fín eins og myndir og lýsing á saumavélinni gefa til kynna. Ég er að sjálfsögðu ekki búin að koma því í verk að losa myndirnar af myndavélinni.

Annars er helst í fréttum að þvottavélin er að gefa upp öndina... nú þvæ ég alltaf með krosslagða fingur og krosslagðar tær og er hætt að þvo á nóttunni þar sem þá vakna ég iðulega í rafmagnsleysi... Vona bara að hún haldi út þangað til við Óli höldum af stað til DK. Ef einhver kann gott ráð til að lækna lasna þvottavél þá eru þau sko vel þegin!

Svo er bara að koma brjálað rok og búið að aflýsa öllum morgunflugum frá Keflavíkurflugvelli... þetta gæti orðið spennandi í fyrramálið! Þangað til næst... bara sofið vel ;o)

Afmælaalda

2006-11-03T23:12:00.000Z

Í lok okt og byrjun nóv er afmælisaldan í minni fjölskyldu. Báðir Ólarnir mínir eru búnir að eiga af mæli... Annar varð 27 og hinn 20. Svo í næstu viku... á miðvikudaginn verður amma á Hjarðarhóli 80 ára. Geri aðrir betur. Þrír miðvikudagar í röð með ammælum.
Annars er frekar langt síðan síðast. Í milli tíðinni fórum við Óli góða ferð til DK, talvan var straujuð og eldhúsið var lagað... nokkuð gott ekki satt!

Annars er kominn háttatími fyrir lítil börn eins og mig... óvissuferð saumavélarinnar á morgun og eins gott að vera úthvíldur fyrir þau átök. Er búin að pakka eftir þessum lista, nema egginu, það fær að vera í ísskáp þangað til í fyrramálið. Annars fylgja hérna með nokkrar myndir frá síðustu mánuðum... svona til gamans!

Páskarnir á Víkinni góðu

Drengirnir á Spáni ;o)

Og svo við pæjurnar...

Hestaferð með Violet!

Felumynd... annars ég í Amsterdam

Í heimsókn hjá Ásu í Óðinsvéum

Og svo við Óli... hann er alltaf svo sætur þessi elska ;o)

alltaf jafn efnileg í blogginu...

2006-10-03T22:37:00.000Z

Það er nú meira. Síðan ég fékk þá flugu í höfuðið síðast að blogga þá hefur sko ýmislegt gerst. Til dæmis er borðtölvan á heimilinu í spyware - vírusa - súpu sem ekki hefur enn fundist lækning á. Svo kom ég heim á sunnudaginn eftir vikudvöl ein í Amsterdam. Frábært að vera svona einn með sjálfum sér í heila viku, maður fær enga leið á sjálfum sér. Var á ráðstefnu um göngugreiningu og CP sem var mjög áhugaverð svo þið þurfið nú ekki að halda að mér hafi leiðst! Það er líka löglegt að reykja marijúana þarna svo það hefði verið auðvelt að hressa upp á ráðstefnuna hefði hún verið boring ;o) Annars erum við Óli á leið til DK á morgun. Ég er ekki byrjuð að pakka fyrir þá ferð þar sem taskan er enn að einhverju leiti upptekin eftir síðustu ferð. Er að íhuga að hella bara úr töskunni á gólfið, veiða óhreina dótið úr og setja hitt bara beinustu leið aftur ofan í tösku. Mér finnst svo leiðinlegt að pakka að ég er meira að segja búin að pússa brauðristina og ísskápinn í kvöld til þess að komast hjá þessu. En nú er varla undankomu auðið. Brottför á völlinn eftir rúma 6 tíma. Svo ég bið bara að heilsa þangað til næst... er farin í frí ;o)

...

2006-09-04T22:17:00.000Z

Nú er ég endanlega sannfærð. Líf mitt getur bara ekki "gengið sinn vana gang." Það virðist vera því lífsins ómögulegt. Eins og allt annað er þessa dagana...

Góð vika...

2006-08-10T09:57:00.000Z

í þessari viku eru bara 3 vinnudagar... Ég gæti alveg lifað með því að það væru bara 3 vinnudagar í hverri viku...

Er farin að tala dönsku aftur... það er magnað. Er svo ryðguð í þessu blessaða máli að ég er farin að stama held ég. Alla vegana, dönskulingarnir eru komnir til að vera... alla vegana til 20. ágúst!

Var fyrir norðan um Versló og er á leiðinni norður í kvöld aftur... vúhú! Væri alveg til í að Reykjavík væri aðeins nær Húsavík svona þegar maður keyrir þetta með 3 daga millibili 4 sinnum í röð!!!!

ROSALEGT

2006-08-01T14:51:00.000Z

Fór að sjá þessa á sunnudagskvöldið. Það var rosalegt...

18. júlí 2006

2006-07-18T09:58:00.000Z

Í dag er merkisdagur. Hún Fjóla vinkona er 25 ára og Rósa vinkona Ínu systur er þrítug! Geri aðrir betur. Langaði bara að óska þessum merku dömum til hamingju með daginn... Til hamingju stelpur... þið standið ykkur vel ;o)

...

2006-07-14T16:38:00.000Z

Ég, Óli og Ína fórum saman í ísbúðarleiðangur í gær sem að vísu er ekki í frásögu færandi í okkar tilfelli! Nema hvað, það er orðinn alveg töluverður tími síðan við höfum komið í ísbúðina í Faxafeni og þeir voru búnir að fara á útsöluna hjá varnarliðinu. Það var kominn polar bear fyrir utan búðina og sá hélt á risa ís, inni voru borð og stólar sem litu út eins og ís auk þess sem þar stóð líka ís í vöffluformi sem var svona meter á hæð. Þetta var frekar skondið. Og hverjir haldiði að hafi svo ekki bara birst í ísbúðinni önnur en Bubbi Morthens og Hrafnhildur Hafsteins... celebs!! Varð samt fyrir vonbrigðum, ég hef aldrei áður séð Bubba áður og hann er lítill... ;o)

Sumar??

2006-07-11T09:24:00.000Z

Akkúrat núna óska ég þess mikið að ég byggi í Kaupmannahöfn. Það er búin að vera hitabylgja þar núna í svooo langan tíma og ég, kuldaskræfan, ætti að búa í heitara loftslagi enn á Íslandi! Að vísu komu þrír þurrir dagar í röð í Reykjavík um helgina og það hefur bara ekki gerst í sumar. Það var samt skítakuldi þó það væri þurrt og sól sko, ekki neitt hitabeltisloftslag sem kemur norðan úr íshafi... Og í tilefni af þurrkinum notuðum við Óli helgina í að mála gluggana á Rauðalæk að utan. Ég var krókloppin nánast allan tímann og þurfti að hafa mig alla við til að geta hreyft puttana en þetta hafðist. Veit samt ekki alveg hvernig skyggnið er út um gluggana núna... við erum ekkert svo góð í að mála! Og það er allt í fokki með íbúðina enn svo ég er seriously farin að íhuga að leigja bara gámhelvítið þangað til við flytjum loksins til DK. Annars erum við Óli tímabundið flutt á Otrateig fyrir þá sem þurfa update. Hjónarúmið þeirra Ellu og Lúðvíks er nefnilega töluvert betra en "T-rúmið" sem við sváfum í á Norðurvanginum...

Fokheld...

2006-06-29T00:07:00.000Z

ég ætlaði ekki að blogga fyrr en ég gæti sett inn smá sýnishorn af myndum frá Spáni til að gera alla öfundsjúka en það verður víst að bíða betri tíma. Þannig er mál með vexti að við erum enn semi heimilislaus og Rauðalækur telst held ég bara fokheldur eins og staðan er í dag. Til að setja inn myndirnar þarf ég snúru sem er á einhverjum mjög óskilgreindum stað líklega inni í gámi svo það gæti dregist töluvert að bíða eftir að hún kæmi í leitirnar.
Annars bara svona sæmó að frétta. Ég veit ekki um nema svo lítið brot af fötunum mínum að ég hef úr að velja einum gallabuxum og einu pilsi þessa dagana. Verð heimilislaus um það bil mánuð í viðbót býst ég við og þá er sko alveg komið meira en gott. En það gekk vel í vinnunni í dag og eins gott að nota sér það til að líta á björtu hliðarnar. Var líka að koma úr saumó þar sem var einn gaur sem er 4 mánaða og annar sem er 2 vikna. Þeir voru svo geeegggggjaaaaað sætir... músímúsí. Það þarf lítið til að gleðja mig þessa dagana...
Og Gunnsó skilaði sér heim úr ævintýraferðinni heill á húfi á mánudaginn og hann færði meira að segja stóru systrum sínum pakka!!! Júhú... svona er hann vel upp alinn og sætur.

... sangría og sóóóól

2006-06-08T09:41:00.000Z

erum búin að stappa í gáminn og læsa og kaupa sólarvörn... svo er það bara sangría og sól í 1/2 mánuð! heheheheheheheeeeeee

Allt að gerast...

2006-06-01T17:44:00.000Z

Vil byrja á að óska hetju dagsins til hamingju. Fjólan kom sá og sigraði með meistaraverkefnið sitt og er núna að leggja loka hönd á ritgerðina og svo held ég hún verði bara á tjillinu fram eftir sumri!! Enda á hún það svo sannarlega skilið! Til hamingju Fjóla, þú ert sknilllllllingur ;o) Að sjálfsögðu til hamingju allir hinir sem ég þekki og voru að klára... þetta er sko stórt afrek!

Annars þá var ég búin að hugsa með mér að skrifa hérna hugljúft blogg um hvað það var gott að vera heima á Húsavík. Fór í Flatey sem er náttúrulega besti staður í heimi og naut þess alveg í botn en ég er alveg hætt við þetta hugljúfa. Það kom nefnilega gámur í bílastæðið okkar í morgun svo nú er bara "mikið púl" eða svoleiðis við flutninga. Annars vorum við Óli að velja okkur nýtt gólfefni á íbúðina bara svona eins og hún leggur sig í morgun og þurftum svo að koma heim til að taka við gámnum. Þegar heim var komið mættum við hins vegar frekar vandræðalegum pípara sem spurði svona pent: "hmmm heyrðu, hvenær var það aftur sem þið ætluðuð að flytja út??" Við Óli svöruðum í kór að stefnan væri tekin á mánudaginn. Heyrðu, haldiði að gaurarnir séu þá ekki búnir að brjóta klósettið í einhverjum tilfæringum... og bara svo þið vitið það þá sit ég núna og held í mér þar sem hér er ekkert nema gat í gólfið. Ég ætti kannski bara að taka svona asíustæl á þetta... ha!!!

Það er sem sagt mikið fjör og mikið grín í mínu lífi þessa daga og eins gott að taka þessu bara öllu með brosi á vör... ekki satt???

Komið sumar??!!!

2006-05-25T23:15:00.000Z

Við Óli erum komin norður yfir heiðar þar sem Óli er að fara í vorveiði á morgun. En þetta er samt frekar skondið allt saman því hérna megin er allt á kafi í snjó, alla vegana ef maður miðar við suðvestur hornið! Eins gott að maðurinn pakkaði föðurlandinu, ullarsokkum og ýmsu fleiru hlýju til að vera í... Annars sagði pabbi að hann skildi bara taka með sér skóflu og moka sér snjóhús, það kæmi hvort sem er ekki til með að veiðast eitt né neitt í svona kulda. En Óli ætlar bara að taka þetta létt með rauðvín í annarri og veiðistöng í hinni skilst mér. Spurning hvort hann endi kannski heim með öngulinn í rassinum í orðsins fyllstu... Held að það gætu alla vegana orðið svolítið spaugilegir taktar á bakkanum ef hann gerir rauðvínið að veruleika! Ég vorkenni samt lóunum og hinum fuglunum sem eru að gefa upp öndina í þessu veðurfari meira en þessum köllum sem eru sjálfviljugir á leiðinni út í snjóskafl um helgina!! Ég ætla aftur á móti að vera í náttbuxunum heima hjá mömmu og pabba þangað til við förum aftur til baka á sun.
Annars bara allt í gúddí fílíng. Auglýsi eftir fólki sem hefur ekkert að gera og er æst í að koma og hjálpa okkur að pakka. Það verður pakkipartý alla næstu viku! Svo eru kvöldin undanfarið búin að fara í yfirlestur á mastersritgerðinni hennar FjóluSpólu. Fjóla er farin að sjá fyrir endann á því spaugi og þá fer maður kannski að sjá hana eikka. Hef ekki séð hana síðan um páska!
Annars eru Gunnar Óli og félagar að blogga úr ævintýraferðinni um Evrópu og ef ykkur langar til að fylgjast með þá er síðan þeirra hérna!
Over and out úr snjónum ;o)

Congratulation...

2006-05-20T22:36:00.000Z

Litli unginn í fjölskyldunni og bara einn sá myndarlegasti í bransanum varð stúdent í gær. Langaði bara að segja til hamingju við hann svona í tilefni dagsins í gær og góða ferð til útlandanna...

Svo erum við náttúrulega svo myndarleg systkinin að ekki sakar að skella inn eins og einni hópmynd... hehe

Miðvikudagur

2006-05-17T23:17:00.000Z

Það væri nú ekki mikið fútt í lífinu ef maður reyndi ekki að krydda upp á tilveruna annað slagið og prófa eitthvað nýtt. Með þetta að markmiði skellti ég mér á kvennalandsleik í handbolta í gærkvöldi. Ég verð alveg að viðurkenna að þetta var aðeins öðruvísi en að fara á leik í kallaboltanum. Við, það er ég, Ína systir og Myriam, mættum á mínútunni átta og samt voru svooo fáir áhorfendur. Sjónvarpsstöðvarnar mættu miklu seinna en við og mér þætti gaman að sjá hversu mikið var í rauninni tekið upp. Og sama dag var verið að auglýsa forsölu á Ísland - Svíþjóð sem fer fram um miðjan júní... kallaboltinn sko. Það er greinilegt að það er ekki mikið meira lagt upp úr konu handboltanum en konu fótboltanum...
Þetta var nú samt ekki það sem stóð upp úr í þessari ferð. Stelpurnar unnu með smá heppnispassa þar sem þær skoruðu sigurmarkið þegar leiktíminn var "nánast" runninn út en þær áttu það skilið þar sem þær voru búnar að vera skrefi á undan nánast allan leikinn. Það sem vakti þó mesta athygli mína (og það var ekki sérstaklega góð athygli...) var fullorðinn maður sem sat við hliðina á mér. Það er bara um tvennt að ræða með þennan mann. Annaðhvort á hann ekki þvottavél og þvær þar af leiðandi aldrei fötin sín, eða hann fer aldrei aldrei í bað. Lyktin var ólýsanleg. Ég gafst upp og varð að anda með munninum nánast allan tímann og var á endanum orðið svo illt í maganum að ég hélt ég hefði þetta ekki af. Var mikið að velta því fyrir mér þarna þar sem ég sat hvort maðurinn vissi hreinlega ekki af þessu eða hvernig á þessu gæti staðið. Var líka mikið að hugsa um að skipta um sæti en fannst það hálf vandræðalegt þar sem það voru nú tvö auð sæti á milli okkar. En ég get bara ekki lýst því hvernig var að sitja þarna og geta hreinlega ekki dregið andann eðlilega þar sem það er mér eðlislægt að nota nefið meira við öndun svona þegar ég er ekki í sundi eða sofandi. Verð því að segja að ég naut þess ekki alveg að skella mér í höllina þetta kvöldið.

jaaháá

2006-05-15T21:00:00.000Z

Maður getur nú varla sagt annað... Silvía Nótt er að valda usla eins og yfirleitt gerist þegar hún á í hlut... get ekki sagt annað en að þetta verði áhugavert allt saman. Það væri nú bara hressandi fyrir júróvisjón að hún kæmist í aðalkeppnina... held ég!!
Allt bara ágætt að frétta annars af þessum kanti. Afrekaði svo margt um helgina að ég svitna við tilhugsina eina saman og nenni engan veginn að telja það allt upp hér. Framundan eru svo góðir dagar... ma&pa&am&af&am á leiðinni því litla barnið í fjölskyldunni verður stúdent á fös. Það er hreinlega allt að gerast.

Til hamingju... til hamingju... til hamingju...

2006-05-11T19:52:00.000Z

Elsku bestasta litla systir í heimi komst inn í LHÍ... og er að fara að læra grafíska hönnun næsta haust. Til hamingju sætasta ;o)

Þreyttur...

2006-05-10T22:48:00.000Z

Var að koma ofan af næsta fjalli. Já eða felli... Við löbbuðum sem sagt upp á Úlfarsfell eftir kvöldmat í kvöld. Það er verið að æfa fyrir gönguna miklu sem verið er að skipuleggja í vinnunni!! Annars bara rólegheit á þessum kanti. Fór á kaffihús með KSP í gærkvöldi sem var voða næs. Hef ekki gert það í langan tíma og alltaf gaman að setjast niður og ræða daginn og veginn við Kristínu.
Annars er það merkasta sem gerst hefur hjá okkur Ólanum undanfarið að fjarstýringin á öðrum bíllyklinum er andsetin og læsti bílnum upp úr þurru á laugardaginn... og lykillinn inni í bílnum en við úti... Svo nú er sú fjarstýring komin í skammarkrókinn og spurning hvort henni verður nokkurn tímann hleypt út aftur!
Svo eru "GÓÐU" fréttirnar þær að líklegt er að gert verði við pípulagnirnar á meðan við förum til Spánar. "EINI" ókosturinn er að við verðum að flytja allt dótið okkar úr íbúðinni á meðan. Svo ef einhver lumar á geymsluplássi fyrir eins og eina og hálfa búslóð þá megiði endilega vera í sambandi og ef þið hafið ekkert að gera í byrjun júní eruði velkomin í niðurpökkunarpartý dauðans...

Lag dagsins: Boys don't cry - The CURE

gleðigleði

2006-05-04T23:27:00.000Z

Í dag er fimmtudagur og komin vika síðan ég bloggaði síðast. Mér tókst ekki að læra golf um helgina þar sem golfvöllurinn við Úthlíð var eitt drullusvað. Það er sko eina ástæðan fyrir því að ég lærði ekki golf. Annars væri ég orðin snillingur í golfi í dag... Svo var bara tekið á því í dag og gengið upp á Helgafell í miður góðu veðri. Við sluppum samt nokkuð vel því áður en við lögðum af stað rigndi eins og hellt væri úr fötu en var svona skapleg rigning á meðan á göngunni stóð. Hins vegar kom gat á himininn þegar við vorum að verða komin í bílana eftir gönguna og er ég mjög þakklát fyrir hvað stutt var eftir. Það fór nefnilega aðeins að kólna svona þegar rigningin var orðin brjúlat mikið.
Á morgun er ég svo home alone þar sem systkini mín eru að vinna og Ólafur er að fara út að borða með starfsmannafélagi actavis pactavis á Argentínu steikhús makalaust. Ekki sátt.... uuurrrrrrr

helgarfrííí....

2006-04-28T16:14:00.000Z

jább, það er föstudagur á kantinum og löng helgi framundan. Stefnan er tekin á sumarbústað actavis í úthlíð með ólanum. Þetta verður pottþétt með latari helgum vetrarins og þótt víðar væri leitað. Svo er líka farið að styttast í sumarið og búið að vera gott veður í 2 daga í röð. Þokkalega. Fór í hádeginu út að borða með FjóluSpólu og Viks og kom þá upp úr dúrnum að ég hef ekki séð Viktoríu í rúmt eitt og hálft ár. Það er mikið. Og það var geggjað gaman að sjá þær!!
Svo er spurning hvort ég þurfi nokkuð meira en eina helgi til að læra að spila golf! Hvað heldur þú?

Jæjajæja

2006-04-22T13:36:00.000Z

Ég er lélegur bloggari... og það er bara allt í læ...
Annars hefur alveg ýmislegt á daga mína drifið undanfarið sem hefur dregið mig frá tölvunni. Ég er bara búin að vera of busy fyrir blogg... eða eikka. Síðan ég skrifaði síðast er ég búin að fara í óvissuferð með yndislegasta kærasta í heimi. Hann fór með mig út að borða og í bláa lónið og þetta var allt voða kósý... Svo er ég búin að fara í 2 barnaafmæli hjá samt sömu manneskjunni, í fermingu og í páskafrí heim á Húsó. Það var svo geggjað gott að koma heim og ég var að íhuga að koma bara aldrei suður aftur... hehehe. Og svo þegar ég kom suður fékk ég hint um að ég hefði bara átt að halda mig fyrir norðan því mér tókst að veikjast og er búin að liggja í rúminu meira
eða minna síðan á miðvikudag. Ég var samt svo óþolandi á fimmtudaginn að Óli samþykkti á endanum að fara í bíó með mér og hann valdi þessa líka eðalmynd. Við fórum á failure to launch með blandt andet sarah jessica parker úr Sex and the city. Þetta var ágætis afþreying fyrir pirraða og lasna sál en alls engin óskarsverðlaunaframmistaða. Mæli samt alveg með henni fyrir þá sem fara í bíó með opnum huga og engar væntingar!!

Og svo bara gleðilegt sumar ;o)

Mmmmmmmmmm....

2006-04-05T19:26:00.000Z

Bestu pizzur í bænum...